Lyon-in hun ṭha an bawhpelh

Pathianni zan khan French Ligue 1 hmahruaitu Lyon leh Monaco te goal awm loin an inhneh­tawk a, hmahruai belhchhahna hun ṭha an bawhpelh.

Lyon coach Hubert Fournier chuan, "Monaco hi Ligue 1 team ṭha ber zing ami an ni a, khelh a harsa a ni. Chutihrualin point thum hlawhchhuah kan duh a, point hloh theih a ni bawk. Point kan hlawhchhuah hrim hrim avangin a lawmawmah ka ngai," a ti.

Fournier chuan sawi chhun­zawmin, "Team boruak a ṭha a, hmahruaitu kan ni bawk. Chuvangin kan forward Alexandre Lacazette hian kan club hi tun January transfer-ah hian min chhuahsan lo ang," tiin a sawi.

Point 49 hmua hmahruaitu Lyon hian tun Pathianni hian champion lai Paris Saint Germain an hmachhawn dawn a, team pahnih inkarah hian point hnih chiah a awm. PSG hi pahnihna Marseille nen an point hmuh zat a inang chiah bawk a ni.