MSL Playoff Semi-final Vawiinah khel dawn
MSL Playoff league stage an khel zo a, vawiinah semi-final an khel dawn a, a hmuhnawm ang. Inkhel hmasa zawk tlai dar 3:30 ah Tuikual South leh KK Basketball Club te'n an khel ṭan ang a, zan dar 6:00 ah Chawnpui VR4 leh Bethlehem BC te'n an khel ang.
Rinkai zawk Tuikual South
Tuikual South leh KK Basketball Club te hi League stage a an intum ṭumin 82-67 in Tuikualin hnehna an lo chang tawh a, league stage ah an tumpui te an hneh vek bawk. Heivang hian KK basketball Club tum hi an huphurh lo ang. Mahse, KK Basketball Club hi 'team spirit' an neih ṭhatzia league stage a an match hnuhnung berah kan hmu a, rinkai zawk Chawnpui VR4 95-93 in overtime-ah an hneh thei tlat.
Tuikual South-ah dan pangaiin Ravi Kant leh Rakesh te an ṭangkai lehin a rinawm a, an captain F.Zodinthara'n team a rawn kaihhruai danin an inkhel a hril thui leh khawp ang.
Squad en chuan Tuikual South hi chak zawk tura beisei an ni. Mahse, KK Basketball Club hi dah hniam ngawt chi an ni lo. An player ṭangkai Malthantluanga hi League stage-ah a ṭhatzia kan hmu tawh a, an captain Alexander Lalrempuia'n team a kaihhruai ṭhatzia kan hmu bawk. Chawnpui VR4 an tum ṭuma an 'fighting spirit' ang kha an lantir leh thei a nih chuan Tuikual South hi final lut saah an dah theih bik hauh lo ang le.
Bethlehem tan 'phuba' lakna hun ṭha
MSL playoff khel tura team inbuatsaih nasa leh players la ṭha ber pawl chu Bethlehem hi an ni. MSL khel tura mipui rinkai zinga mi an ni a, mah se mipui beisei angin an la khel chhuak lo.
League stage a Chawnpui VR4 nen an intum ṭumin mipui rinkai nizawk chungin 63-75 in an chak lo. MSL khelh an tum tak tak a nih chuan league stage aia an khelh ṭhat a ngai ang.
Bethlehem hian Lalruatfela leh Vanlalṭhafamkima te an ṭangkaipui lehin a rinawm a, anni pahnih hi team chakpui thei khawpa players ṭha an ni. ARC aṭanga an lak Tinku Singh an la neih cheu bawk avangin Bethlehem tum hi a chakawm lo.
Chawnpui VR4 lamah Lalnunmawia Sailo leh Lalthanmawia te an chet ṭhat leh a ngai ang a, K. Lalchhuanawma khelh leh khelh lohin an dinhmun a hril thui bawk ang.