La Liga barakhaih zan - Real leh Barca an tlawm!

Football mawina phochhuahin an awm leh ta - Inrinni zan khan La Liga inkhelah Real Madrid leh Barcelona an tlawm a, Atletico Madrid an chak thung. 

Santiago Bernabeu-ah Real Madrid-in Cadiz an mikhual a, mahni muala khel an nih avangin chak tura ngaih ni mah se Cadiz lakah 1-0 in an tlawm!

Cadiz tan hian Anthony Lozano chuan inkhela goal awmchhun a khung a, Real tan a chhanglet thei an awm lo - an hmelma chak loh zanah Barcelona pawh eng ruai an ni bik lo. 

Ronald Koeman hnuaia indin-thar tum Barca hian khualmualah Getafe chu 1-0 in an ngam lo a, Jaime Mata chuan penalty aṭangin inkhela goal awmchhun hi a khung. 

Season hmasa La Liga a Real champion chhan langsar tak pakhat chu Barcelona chet chhiat lai nen a innan vang ni berin a lang a, hetichung hian nipui transfer-ah Real an bazar lo. 

Real Madrid hian an match hmasa berah Real Sociedad chu goal khung loin an inhnehtawkpui a, a hnuah a zawnin vawi thum chak mah se an chak dan enin inchhuanna tur erawh a awm chuang lo niin a lang. 

Hetichung hian Inrinni zanah chak tura beisei an ni a, Santiago Bernabeu-ah meuh champion laiin La Liga kai thar an hneh loh hi a rinawm loh - mahse chu tak chu football ti hmuhnawmtu a ni. 

Minute 16-na lekah Anthony Lozano chuan a finishing ṭha tak hmangin goal a khung a, Manchester City striker hlui Álvaro Negredo siamsak a ni. 

Santiago Bernabeu-ah Cadiz an chak a, La Liga a Real Madrid khelmuala an chak hmasa ber a ni - heti chung hian Cadiz hi an vanduai zawk anga sawi a la ngai cheu.

Kum 35 mi Negredo-a'n goal khungna remchang a neih chu a tauh 'out' a, a goal khung ngei tur nia lang chu Sergio Ramos chuan line aṭangin a pet chhuak hman bawk - Ramos hi second half-ah hliam vanga lakchhuah a ngai. 

Goal khungtu Lozano-a'n chance dang a nei leh bawk a, mahse goalkeeper Thibaut Courtois-a'n a dansak. Real-in chance nei lo tawp erawh an ni bik lo. 

Luka Jovic-a goal khung chu offside vangin pawm a ni lo a, Karim Benzema chuan a hun ṭha neihah bar a tih per bawk - target-ah vawi hnih chiah shot an nei!

Real Madrid chak loh thu hre sain Barcelona an inlan a, phur phah nan an hmang lo - Getafe lakah 1-0 in an tlawm. Inkhela goal awmchhun hi minute 56-naa penalty aṭanga Jaime Mata khung a ni. 

Barcelona midfielder Frenkie de Jong chu Getafe centre back Djene Dakonam lakah a foul a, penalty hi a chawi - kum 31 mi Mata chuan penalty hi a pet a, inhliam vanga inlan thei lo Marc Andre Ter Stegen aia goal vengtu Neto-a'n tih theih a nei lo. 

Catalan club-in 73% zet ball an chang chungin goal erawh an khung thei lo a, Lionel Messi chuan post a tih per bakah Antoine Griezmann chuan hnai set sawt aṭangin a pet over bawk. 

Hetihrual hian Getafe pawhin goal khung belhna remchang an nei a, mahse hun tawp nan minute nga chauh a awm tawh tiha a chance neih chu Juan Hernandez  chuan bar tihper nan a hmang. 

Nipui transfer a thawm a neih hat hnuah Messi a la 'Messi' hleithei lo a, tun season a league match li a khelhah goal khat chauh a la khung - a goal khung hi Villarreal laka 4-0 a an chak ṭuma penalty aṭanga a khung a la ni zui!

Argentine forward hian assist vawi hnih a nei tel tawh tih erawh hriat tel a ṭha a, match li an khelh tawhah goal thum a thawk chhuak tawh tihna a ni - heti zawnga sawi chuan a ropui a, chutihrual chuan Messi a nih miau avangin beiseina a sang lo thei lo. 

Barca coach thar Koeman-a'n Griezmann chungah rinna a nghat chungin French forward hian a pu thar duhsakna chu a la chhanglet thei lo a, league match li a khelh tawhah goal leh assist a la nei miah lo - a 'class' ngaihtuahin mangan a hun ta. 

Griezmann hi Koeman-a'n right wing-ah a dah ṭhin a, France tana a fehchhuahnaa goal a khung hnuin Griezmann hian striker hnung emaw a hmaa khelh nuam a tih thu a sawi a, France boss Didier Deschamps-a'n a thlawp bawk - mahse Getafe laka striker anga chhawr a ni chungin Griezmann a vul thei lo. 

Khawvel football a inkhel ngaihven hlawh ber pawl chu El Clasico a ni a, October 24 zan dar 7:30-ah Barcelona-in Real Madrid an mikhual dawn - a 'hot' loh ring suh. 

Mahse, Inrinni zanah club pahnih an chak lo a, April 2003 hnua a vawi khat nan El Clasico-ah an league match hnuhnunga tlawm ve ve chungin Barcelona leh Real an inkhel dawn. 

El Clasico hma hian club pahnihin Champions League match khat an la khelh ve ve a ngai thung a, an chak theih chuan Inrinni zan an mualphona theihnghilhin phur takin El Clasico an hmachhawn thei ang. 

Barcelona hian Thawhlehni zan dar 12:30-ah Hungarian club Ferencvaros chu Champions League group stage a an match hmasa ber atan an mikhual dawn a, Real chuan Nilaini zan dar 10:25-ah Shakhtar Donetsk an mikhual ve dawn bawk a ni. 

League match hnih a zawna hnehna an chan zawh loh hnuin Atletico Madrid chuan 2-0 in Celta Vigo an hneh a, Barca leh Real kaltluan laia dinhmun chhe tak anga lang hman kha an hnufual ta bik lo. 

Barcelona-in goal khung an harsat laiin an duh loh hnu Luis Suarez erawhin Atletico tan goal khung hna a thawk a, minute rukna lekah goal hmahruai a khung. 

Atletico tan hun pek belh minute nganaah Yannick Carrasco chuan goal khat dang a thawh ve leh bawk a, Celta tan full back Sergio Carreira leh forward Santi Mina-ten hun ṭha an chhawr thei lo. 

Hetihlai hian Suarez-a'n goal hnih khungna remchang a neih a chhawr thei lo a, Thomas Lemar chuan bar a tih per bawk - Atletico hian Nilaini zan dar 12:30-ah Champions League group stage match khel turin Bayern Munich an lenchilh dawn a, Inrinni zan result hi infuihphurna remchang tak a ni.