PSG chakna Kylian Mbappe

Paris St-Germain chuan player 10 a khel Nimes lakah zahngaihna an lantir lo, team nem zawk hi 4-0 ngawtin an luhchhuah - Ligue 1 champion tan hian rawlthar duhawm Kylian Mbappe chuan goal hnih a khung.

Nimes defender Loick Landre chu Rafinha laka a chet dan mawi lo vangin minute 12-naah hnawhchhuah a ni a, a hnu lamah chuan PSG lamin a khat mawi tawkin goal an khung chhunzawm.

Mbappe bakah hian Alessandro Florenzi leh Pablo Sarabia ten goal khat ve ve an khung, French champion hian South America lama World Cup qualifier khel chau Neymar chu hahchawlhna hun an pe a, goal khung lamah erawh harsatna an tawk chuang lo.

Season hmasa Champions League finalist hian tun karah inelna lian an hmachhawn zui dawn. Thawhlehni zan dar 12:30 hian UCL group stage khel turin Le Parc des Princes-ah Manchetser United an mikhual ang.