Juventus chak zo lo

Cristiano Ronaldo tel loa khel Juventus chuan Crotone an hneh zo lo, an mikhualna ramah 1-1 in an inhnehtawk. Old Lady winger Federico Chiesa chu club tana a match hmasa ber a khelh zanah hian hnawhchhuah a ni.

Inrinni zan Stadio Ezio Scida-a inkhelah Crotone tan Simy chuan minute 12-naah penalty aṭangin goal hmahruai a khung a, mikhual Juve lamin striker Alvaro Morata hmangin si phurh an sut.

Spanish striker hian an goal hnihna pawh a khung, mahse offside vanga pawm a ni lo. Minute 60-naah winger Chiesa chu hnawhchhuah niin, player kim loa an khelh hnuah Italian champion hian chakna goal an khung thei tawh lo.

Andrea Pirlo naute hian match li aṭangin point sarih an hmu a, an point neih zinga point thum hi Napoli lak aṭanga an hmuh a ni. Napoli nen hian inkhel hah loin point pek an ni, an khingpui tur hi coronavirus vangin an inlan lo a ni.

Inkhel dangah Napoli chuan Atalanta 4-1 in an sawp. Gennaro Gattuso naute hi an awmna Naples thuneituten zin chhuak lo tura an tih vangin Juve an hmachhawn lo kha a ni a, tunah erawh mikhual thleng theiin chak duha an tuihal zia an lantir.