GIG Motors I Day Football-ah ISL club NE United an tel dawn

Tualchhung football inelna ngaihhlut hlawh ber zinga mi I Day Football Tournament chu July 31, Nilaini aṭangin RG Stadium-ah khelh a ni dawn. MFA buatsaih inelnaah hian NorthEast United an tel dawn tih a chiang tawh a, ISL club hi MPL club-te nen an inel dawn a ni.

I Day Football-ah hian team 10 an tel dawn a, MPL club pariat leh NorthEast United bakah Aizawl DFA First Division aṭangin Bethlehem Vengthlang an tel dawn. Club 10 hi group hnihah team hnih ve vea ṭhen an ni a, vawi khat ṭheuh an inkhelh kual hnuah a sang pahnihin semifinal an khel ang.

Group ṭhen dan

Group A-ah MPL11 hmahruai mektu Chanmari FC, hneh loh la tawng lo SYS FC bakah harhtharna chang mek Sihphir Venghlun FC leh Ramhlun Athletic FC bakah First Division club Bethlehlem Vengthlang te an awm.

BVT hi season liam ta khan ADFA First Division league round-ah pakhatna an ni a, MPL Qualifier khel pha mah se FC Bethlehem leh SYS FC te an tluk tak loh avangin MPL an khel pha ta lo.

Group B-ah MPL champion lai Mizoram Police, I League club Aizawl FC, Chawnpui FC leh MPL kaithar FC Bethlehem te an awm a, ISL club NorthEast United an awm bawk.

MPL club pariatte insemrual viau mah se a belhtu team hi ISL club leh Aizawl DFA First Division club an nih daih avangin an inṭhat hleih chiah. NorthEast United awmna group hi an ṭha ta zawk a, group B aṭangin semifinal thlen phak a har lehzual ang.

Fixtures chu

I Day Football match hmasa berah Chanmari FC leh SYS FC te an inkhel dawn a; July 31, Nilaini chhun dar 12:30-ah an inkhel ang. Tlai dar 3:30-ah Ramhlun Athletic leh BVT te an inkhel dawn.

August 1, Ninganiah group B an inlan dawn. NorthEast United an inlan nghal dawn a, B. Malsawmzuala enkawl Chawnpui nen chhun dar 11:00-ah an inkhel dawn. Chawhnu dar 2:00-ah FC Bethlehem leh Mizoram Police te an inkhel zui dawn.

Group stage hi August 10, Inrinniah khelh a ni dawn a, semifinal hi August 12, Thawhṭanniah khelh a ni dawn. Final hi August 15, Ningani hian RG Stadium-ah khelh a ni ang.