East Bengal-in ISL khelh an tum I League hma hun a thim sawt?

Kolkata club lian East Bengal-in an hmelma Mohun Bagan-in Indian Super League an khelh laia I League khelh bik an duh lo a, season thara ISL khel thei dinhmunah an ding mek. 

East Bengal-in ISL an khelh theih nan hian West Bengal chief minister Mamata Banerjee chu hma latu langsar a ni a, Mamata hian Kolkata club-in ISL an khelh tur thu hi Nilaini tlai khan a puang. 

ISL chuan East Bengal-in ISL an khelh tur thu official taka puanzarna nei lo mah se Nilaini zan khan Shree Cement leh East Bengal inremna erawh a chiang tawh a, Kolkata club hian ISL khel turin pawisa an nei tihna a ni. 

India rama league sang berah hian Mohun Bagan chuan ATK nena inzawmin ISL an khel dawn chiang tawh a, East Bengal kan hmu leh a nih chuan ISL-ah Kolkata derby boruak 'hot' kan hmu dawn tihna a ni nghal - hei hian a ti nghahhlelhawm zual hle.  

July 2018 khan Quess Corp chuan East Bengal-ah neitu nihna 70% an lei a, hetihlaia Kolkata club ṭantuten an mitthla ber chu ISL a ni a, transfer bazar lamah pawh an che na hle.

Mahse, Kolkata club hian coach leh player langsar thlenga an lalut chungin ISL an khel lawk lo a, Quess thuneitute chuan ISL khelh hi tum berah an lo nei hran loa nia sawi a ni. 

Hetiang boruak karah hian East Bengal leh Quess thuneitute an inhmu lo a, June thla khan Quess hi East Bengal aṭangin an inhnukdawk a, Kolkata club thuneituten an club-a share lei duh tur an zawng. 

East Bengal buai karah Mohun Bagan erawhin ATK nen inremna an nei a, season tharah ISL an khel dawn - hei hian East Bengal fan-te a ti lunghnur takzet a, an hotute duhkhawp lohna a ri ring hle. 

East Bengal-in fans an ngah tih an inhai bik lo a, biak ṭhat tur be ṭha nghal chatin West Bengal chief minister Mamata Banerjee hnenah an ṭuan a, anin theihtawp chhuahin Kolkata club hi a lo pui. 

Mamata inrawlh a zarah East Bengal-in Shree Cement inremna an neihpui a, Kolkata-a hmunpui nei Shree Cement hian sum lamah buaina an neih loh avangin transfer bazar lamah chuan East Bengal an buai dawn lo - an jersey sponsor tur pawhin Adidas sawi rik an ni. 

Nilaini tlai khan Mamata ho hian East Bengal leh Shree Cement thuneituten media an hmachhawn a, West Bengal Chief Minister chuan, "Hei hian midang tan kawng a hawn ka beisei. Shree Cement-in tun ang hun harsaa football-a an sum an hmang tur hi a lawmawm hle. 

"East Bengal-in an hma hunah harsatna an neih tawh loh ka beisei a, keini chuan Bengal hi engkimah a ṭha ber ni se kan duh a ni mai. Bengal hian midangte tan kawng a kawh hmuh tur a ni - East Bengal buaina a kiang ta leh ISL an khel thei tur hi ka lawm a ni," a ti. 

Kolkata-a hmunpui an neih piah lama India ram hmun hrang hranga hmun nei Shree Cement chairman chu Benu Gopal Bangur a ni a, Forbes-in February, 2020-a a tarlan dan chuan Bengali sumdawng hausa hian dollar tluklehdingawn 6.4 a nei. 

Forbes Billionaire List 2020-ah khan 268-na a ni phak a, sum ngah lamah chuan Premier League club 20 zingah Manchester City neitu Sheikh Mansour, Chelsea siam liantu Roman Abramovich leh Arsenal neitu Stan Kroenke te chauh chu Benu Gopal aia hausa an ni!

Shree Cement hian East Bengal-ah hian 76% share an nei dawn a, East Bengal lam hian 24% share bak an nei dawn lo tihna a ni. EB general secretary Kalyan Majumdar, "Cement company nena kan inremna hi a nghet ṭha hle ang. 

"Kan club kum 100 tlin kuma kan hlawhtlinna zawng zawng chu Mamata Banerjee tan ni ang," a ti - kumin hi East Bengal kum 100 tlin kum a ni a, Mamata chunga an lawmna a sang hle. 

July 24 khan Indian Super League enkawltu Football Sports Development Limited (FSDL) leh ISL club aiawhte an inhmu khawm a, season thara ISL club 10 bak awm lo turin an rel. 

Chutihrualin ISL hian official takin tun season-ah ISL club 10 chauh an awm dawn tih a la puang lo a, Ocotober 2019-a All India Football Federation (AIFF)-in Indian football kalphung tur a tlangzarhna en phei chuan East Bengal hian an duh phawt chuan ISL hi an khel thei ang. 

AIFF hian October 2019 khan Asian Football Confederation (AFC) hmunpui Kuala Lumpur-ah Indian football kalphung tur a puang a, heta a puan dan ang chuan season thar 2021-2022 hi I League club pahnihin ISL an zawm hun a ni. 

I League club pahnih hi ISL club dang ang thoa franchise fee pe tura ngaih an ni thung a, tunah chuan he hmun ruak hi Mohun Bagan leh East Bengal-in an hnawhkhat thei ta chiah. 

Mi tam tak ngaihdanah ISL-a tel turin East Bengal tan hun a chep tawh - mahse Mamata chuan AIFF president Praful Patel a biak tawh thu a sawi a, Patel hian Mamata-i dilna hi en liam a harsa ang. 

Hei mai a ni lo. East Bengal-in ISL an khelh chuan Kolkata derby boruak 'hot' lutuk kha ISL-in a nei thei dawn tihna a ni a, Covid-19 vanga ISL boruak dai karah East Bengal hi boruak siam thei tur an ni. 

Mamata-in Patel-a biak bakah hian East Bengal leh Shree Cement lam hian ISL khelh an duh thu Football Sports Development Limited hnenah an hriattir tawh a, FSDL tan EB fans neih zat leh Shree Cement hausakna thlirin hnar a harsa ang. 

Chutihrual chuan FSDL hian ISL khel duh dilna hun a hranpain a hawng leh phawt ang a, East Bengal hian dilna thehlutin ngaihtuah leh a ni ang - Kolkata club tan transfer bazar-a player lei nen hun a chep dawn a, ISL khel pawh ni se season ṭha tak hman chu a harsa khawp ang. 

East Bengal-in ISL an khel a nih ngat chuan I League boruak a hniam sawt dawn tih hai rual a ni lo a, EB leh Mohun Bagan tel lohna I League hian tun hma angin ngaihven a hlawh tawk lo ang. 

Chutihrual chuan Indian FA-in October 2019-a Indian football kalphung a tlangzarh khan 2021-22 season-a I League champion-in 2022-23 season-ah ISL an khelh tur thu an tarlang a, AIFF hi an ruahmannaah an ding nghet a nih chuan ISL hmun ruak inchuh tur awm hian I League a ti 'hot' viau thei. 

Hei mai a ni lo - Kolkata 'Big Three' tia East Bengal leh Mohun Bagan nena huang khata dah ṭhin Mohammedan S.C. chuan second division champion ni a, season thara I League khelh ngei an tum a, Mohameddan hi an tling a nih ngat chuan I League boruak chhem nung tur khawpa boruak nei an ni. 

Black Panther hming lem an pek club hian coach atan Yan Law an lalut a, Mizo player Vanlalbiaa Chhangte, Sena Fanai, Moses Lalrinzuala leh MS Dawngliana te an kawl bawk.

Mizo legend S. Malsawmtluanga hmangin Mizo zingah chuan East Bengal-in hmelhriat an hlawh a, Mama hnua Kolkata club-in Mizo player zinga 'legend' an neih tia chhal ngam chu Lalrindika Ralte a ni. 

Lunglei tlangval hian Kolkata club-ah hian contract la nei mek mah se Quess nen an inzawm laia contract a nih avangin tihfel ngai a la awm a, East Bengal nen hian indawrna an kalpui mek. 

Didika hi Punjab FC bakah Mohammedan lamin second division khelhpui a, I League an tlin chuan an hnena cham turin an thlem bawk a, hei erawh a hnar - ISL club dang nen indawrna a awm nual bawk. 

India tana vawi 14 lo inlan tawh Didika chuan, "East Bengal-in ISL an khel a nih chuan Mohun Bagan nen an awm dawn avangin ISL a hlu sawt ang a, Bagan mai ni lo an elpui  ṭhin Bengaluru FC an lo awm sa bawk avangin hei ringawt pawh hian boruak a ti sang viau ang," tiin Vanglaini a hrilh. 

ISL-ah pawh Mumbai City, ATK leh NorthEast United tana lo khel tawh Didika chuan, "East Bengal an kal a nih chuan I League hlutna hi chu a tlahniam lo thei lo. Chutihrual chuan EB hi fans nei ṭha, club hlun leh hun rei tak lokal tawh an ni a, ISL khelh hi an phu a ni," a ti.