Olympic hmachhawn turin India a inpeih

Paris Olympic 2024 chu July 26, Zirtawpni aṭangin an ṭan tawh dawn - infiamna khawmpui lian tak mai hmachhawn tur hian India pawh a inpeih tawh. Indian Olympic Association (IOA) president PT Usha-i pawhin inelna neihna tur hmun a thleng tawh.

India hian infiammi 117 a tir chhuak a, an zinga 70 chu mipa niin hmeichhia 40 an awm bawk - infiammi bik hi chu Olympic Village chhungah an awm vek dawn, kum dang zawng aiin IOA chuan medal lak tam theih an inbeisei a ni.

PT Usha chuan, "IOA lam aṭanga thlir chuan kan tih tur chin chu ṭha leh tluang takin kan ti niah ka ngai, kan ngaihpawimawh ber chu player-te an ni a, an mamawh leh ṭul ang zawng zawng chu kan tihsak.

"Kan naute hian thlamuang leh engthawl takin inelna hmachhawn thei se la tih hi kan duh dan a ni a, chutiang boruak hnuaiah chuan anmahnia a ṭha ber pawh an tarlang thei ang," a ti a, inbuatsaihna a kaltluan bakah India a inpeih tawh tih a sawi bawk.

India hian Olympic sulhnu ropui tak neih a harsat - Tokyo Games kha a chet ṭhat ṭum niin medal pasarih a la, gold medal pakhat, silver medal pahnih leh bronze medal pali te an ni a, tun ṭumah hian khum ngei an tum dawn a ni.

Khawvel huap infiamna khawmpui lian ber a nih avangin a huam a zau a, infiammi 10,714 an inlan tura beisei a ni a, hun tepter taka hliam leh inhnudawk awm theih a nih avangin a zat tur tak hi sawi fak theih erawh a ni lo.

Infiammi chi hrang 32 a awm dawn, heng aṭang hian gold medal lak theih 329 tehmeuh a awm dawn a ni. Ram 206 ten inelna an hmachhawn dawn a, ram ropui leh infiammi ṭha ber berte inlanna tur a nih avangin gold medal pakhat lek lak pawh a harsa dawn - a awlsam lohzia hrechiangtu chu India a ni.

Medal lak theihna hmasa ber tur chu shooting a ni dawn - mixed team air rifle chu July 27 hian an zai nghal dawn a, medal pawh sem nghal a ni ang. Medal hnuhnung ber tur chu hmeichhe basketball niin August 11, Pathianniah a hmawr an bawk thung ang.

Paris Olympic neih turah hian tun hma lama thil la tih ngai loh tih thar tur ṭhenkhat a awm dawn, lam (dance) chi khat 'Breaking' a ni a, he inelna huangah hian mi 32 an inlan dawn, mipa leh hmeichhia 16 ve ve an tel dawn a ni.

Inelna hnuhnung Tokyo lama kan hmuh baseball/softball leh karate te chu tun ṭumah hian telh a ni dawn lo. Kayak cross chu a vawi khat nan telh a ni dawn a, hei bakah hian artistics swimming chu mipa tan telh a ni ve bawk ang.