Nomawi kan chawi thuai ka beisei - Chelsea boss

Chelsea coach thar Enzo Maresca chuan London club chu champion tura zawm a nih thu a sawi a, Blues manager hian a hma lama nomawi chawi a inbeisei thu a sawi chhuak - awlsam erawh a awlsam lo ang.

Maresca chuan, "Chelsea ang club langsar kan zawm a nih chuan inelna hmachhawn a, nomawi chawi kan tum tur a ni. Champion tum zinga tel kan duh a, a hma lama nomawi kan chawi theih ka beisei," a ti.

Kum 44 mi coach hian nomawi a chawi vat loh chuan dawhtheihna tlachham ve tak Chelsea-ah a cham rei a rinawm loh - May 2022 khan Chelsea hi American sumdawng hausa Todd Boehly leh a thawhpuiten an lei a, Maresca hi Blues an lei hnua coach an lakluh palina a ni!

Chalobah a tel lo

Chelsea hian nimin khan pre-season tour nei turin USA an pan a, hetah hian chhuak tur anga sawi awm reng Trevoh Chalobah a tel lo. Kum 25 mi centre back hi Blues hian hralh an pawi ti lo nia sawi a ni a, Premier League club pathumin an beisei - pound maktaduai 35 an chhiar niin an sawi.

Maresca chuan, "Player thlauhthlak bik neih hi thil nuam tak a ni ngai lo a, mahse, he hmunah hian huaisen taka thutlukna siam tura kal ka ni - Wesley Fofana, Axel Disasi, Tosin Adarabioyo leh Josh Acheampong kan nei sa a ni," a ti a, Chalobah tan hmun a awm loh thu a sawi.

Chalobah hi Chelsea academy chhuak niin, Ipswich Town, Huddersfield Town leh Lorient-ah te loan-in a khel tawh a, season hmasa khan Blues tan match 17 a khel ve a, goal khat a khung.

Enzo a chhan

Chelsea midfielder pawimawh Enzo Fernandez chuan tun hnaiah thawm a nei - Copa America champion Argentina team-ah Enzo hi a tel a, champion lawma an zaina lamah France an tihel. Hei hi France lamin an hrethiam lo a, chi inthliarna lam hawiah an ngai.

French Football Federation lung a awi lo a, FIFA-in a chhui chiang mek. Mahse, Maresca chuan a player hi chhanin, "Kei chuan ka ngaizam khawp a, midang rilru natna thlen tumna awmah kei chuan ka ngai hran lo.

"Player-in ngaihdam a dil thlap tawh a, club-in a tihtur a ti tawh a, sawi belh tur awmin ka hre lo. Ka ngaihdanah chuan player naupang tak an ni a, rilru kawisawi an pu lo," a ti a, a player leh Argentina a chhan.

A buai lo

Enzo-a'n Chelsea-a a khelhpui Wesley Fofana chu Argentina chet dan la na zual zingah a tel a, social media lamah Argentina chet dan video hi tarlangin, "Hei lo liama vun rawng inhmuhsitna a awm chuang lo," a ti.

Blues-ah mihang player an awm nual bawk avangin Enzo chet dan hian nghawng a nei tura ngaih a ni a, hetiang boruak karah hian Chelsea mihang player tho Nicolas Jackson chuan Enzo chu midang hmusit chi a nih loh thu a lo sawi tawh bawk.

Blues coach Maresca chuan, "Enzo lo kir hunah eng buaina mah kan neih ka ring lo. Enzo-a'n engkim a sawifiah tawh a, club-in a sawifiah tawh a, misual a ni lo. Thil thleng ve thei a ni a, chutihrual chuan Enzo leh player dangte pawh ka titipui vek tawh a, buaina a awm lo," a ti.

Hmabak chu

Italian second division club Ascoli aṭanga a coaching career zawh ṭantu Maresca hi Manchester City assistant coach hlui a ni a, Serie B club Parma enkawl tawhin, season hman zawh takah khan Leicester City chu Championship nomawi a chawipui.

English top flight league-ah a pu hlui Pep Guardiola enkawl Manchester City, coach thar Arne Slot-a enkawl Liverpool, Mikel Arteta tuai hnum Arsenal, Erik ten Hag-a enkawl Manchester United leh Ange Postecoglou enkawl Tottenham Hotspur te nen an inel leh dawn a, a awlsam lo ang.

Blues hian tukin zing dar 8:00-ah Wrexham nen inkhelin, season thar atana inbuatsaihna an ṭan dawn a, US an cham chhungin Celtic, Club America, City leh Real Madrid te nen an inkhel ang a, August 11 zanah Inter Milan mikhualin pre-season match hnuhnung ber an khel ang.

US tour Chelsea squad

Goalkeepers: Robert Sanchez, Marcus Bettinelli, Eddie Beach, Lucas Bergstrom.

Defenders: Reece James, Malo Gusto, Josh Acheampong, Wesley Fofana, Axel Disasi, Tosin Adarabioyo, Benoit Badiashile, Levi Colwill, Ben Chilwell, Renato Veiga.

Midfielders: Carney Chukwuemeka, Romeo Lavia, Lesley Ugochukwu, Kiernan Dewsbury-Hall, Andrey Santos.

Forwards: Nicolas Jackson, Christopher Nkunku, Raheem Sterling, Mykhailo Mudryk, Noni Madueke, Armando Broja, Tyrique George, Marc Guiu, Angelo.