Saudi lamah Diaby a pem dawn

Aston Villa winger Moussa Diaby chuan Saudi Pro League club Al-Ittihad a zawm dawn a, a man zat tur hi pound maktaduai 50.4 a ni ang - he thuziak i chhiar meuh chuan an inrem fel hial tawh mai thei.

Kum 25 mi forward hi he thu buatsaih a nih lai hian Saudi-ah a awm tawh a, medical a neih hnuah Al Ittihad hi a zawm chiang ang - season thara Champions League khel tur Villa-ah season khat bak hun a hmang hman lo.

French winger hian season hmasa khan Bayer Leverkusen aṭangin Villa hi a zawm a, a man zat hi £51.9mtd niin, Villa player man to ber record a siam.

Villa-ah Diaby a tlangnel nghal a, a season khatnaah match 54 khelin goal 10 a khung a, assist vawi kua a nei. Villa-in European football an khelh theih nan player pawimawh a tling a, mahse, Al Ittihad an lo lan takah chuan Unai Emery-a'n hralh mai a pawi ti lo.

English club hian Hull City aṭangin an player hlui, winger Jaden Philogene chu £13.5mtd-in an la let tawh a, English forward hi hmun pawimawh chang tura beisei a nih avangin Emery hian Diaby a hralh ngam phah.

France winger Diaby hian season hmasa khan Al Nassr aṭangin sawmna a lo dawng tawh a, Villa pan a thlang zawk. Tunah erawh Saudi lam a pan dawn ta tho a, kum khatah £20mtd a hlawh dawn niin an sawi.

Villa hian Joao Felix pawh an beisei nia sawi a ni a, Atletico Madrid forward hian season hmasa kha Barcelona-ah loan-in hun a hmang a, match 44-ah goal 10 khungin, assist vawi ruk a nei.