Morata & Rodri thubuai siamsak

Spain captain Alvaro Morata leh ram tana a khelhpui Rodri te chuan Euro champion an lawm uchuak hret a, Britain awpna hnuaia awm, Spain ram chhim lama ram tê tak tê Gibraltar huat zawnga an ṭawngchhuah avangin UEFA chuan thubuai a siamsak.

July 15 khan Cibeles Square, Madrid khawpuiah Spain hian an fan-te nen champion an lawm. He hunah hian Manchester City midfielder Rodri chu, "Gibraltar chu Spain-a awm a ni," tiin a lo au pek - Morata chuan lo pui vatin, fan-te chu an au hla zawm turin an ti.

Hei hi Gibraltar Football Association (GFA) lam chuan hrethiam loin, UEFA hnenah an zualko a, European football-a thuneitu sang hian an zirchian hnuah player pahnih hi thubuai an siamsak.

UEFA chuan player pahnih hi infiamna huang chhunga mawi lo taka an chet avangin thubuai an siamsak a, thil nihdan phung awmsa an bawhchhia a ni, an ti a, football leh UEFA hmai an tibal a ni, an ti bawk.

Mipui 30,000 chuang awrh awmna Gibraltar hi kum 2013 aṭang khan UEFA member an ni ve ṭan a, Gibraltar FA chuan Spain player pahnih chet dan hi an dem takzet thu sawiin, thuchhuah an siam a ni.