Saudi lamin Trippier lung a len

Newcastle United right back Kieran Trippier chu Saudi Pro League nen sawizawm mek a ni a, English defender hian season thar chu Saudi lamah hun a hmang a nih pawhin a mak lo ang.

Magpies indin-tharlehna kawnga player pawimawh Trippier hian St James' Park-ah kum khat bak contract a nei tawh lo a, contract thar a la ziak rih lo. Hei vang hian Magpies hian hralh theih a nih laia hralh mai hi an hnial lo nia sawi a ni.

Hei mai a ni lo - Trippier hi kum 33 mi a ni tawh a, Magpies hian kum 21 mi Tino Livramento chu hmun pawimawh chantir an tum chho nia sawi a ni. Livramento hian season hmasa ṭan dawn khan Southampton aṭangin Magpies hi a pan a, inelna hrang hrangah match 35 khelin goal khat a khung a, assist vawi khat a nei bawk.

England international Trippier hian season hman zawh takah khan match 39 khelin goal khat a khung a, assist vawi 11 a nei. Season tharah Saudi Pro League a khel a nih pawhin a mak lo ang.