Gareth Barry a lo kir

Premier League match khel tam ber record chelhtu Gareth Barry chuan inkhelh chawlhsan tawh mah se khelmual a lo kir leh dawn a, English 11th division club Hurstpierpoint tan a khel ang.

Kum 43 mi Barry hian kum 2020 khan West Brom aṭangin inkhelh a chawlhsan a, Premier League match 653-ah inlanin, ani aia inlan hnem an awm lo.

Barry hian Aston Villa-ah a hming chherin, hemi hnu hian Manchester City, Everton leh West Brom tan a khel a, 2011-12 season khan City chu Premier League-ah champion nomawi a chawipui - 2010-11 season kha FA Cup-ah a champion bawk.

England tan match 53 khela goal thum khungin, assist vawi ruk a nei a, Euro 2000 leh World Cup 2010-ah ram tan a feh chhuak.

Hurstpierpoint chairman leh first-team manager Dudley Christensen chuan, "Club training rawn zawmin, nuam a ti hle. Kar tin chu a inkhel thei kher lo ang a, mahse, kan tan chuan transfer ṭha tak a ni a, kan club min chawi kang dawn a ni," a ti.

Barry hi Hurstpierpoint coach Michael Standing-a ṭhian ṭha tak a ni a, a ṭhianpa pui turin Mid Sussex Football League second division club hi a zawm a ni.