Mourinho-a'n Fenerbahce a chakpui nghal

Turkish Super Lig club Fenerbahce zawmtu Jose Mourinho-a'n Thawhlehni zan khan competitive match-a a vawi khat nan Fenerbahce a enkawl a, Champions League second qualifying round-ah FC Lugano hmachhawnin, 4-3 in hnehna a chanpui.

Swiss Super League club laka chak turin Fenerbahce hian vanneihna an mamawh. Lugano hian Ayman El Wafi hmangin minute lina lekah hma an hruai a, mahse, kum 38 mi Edin Dzeko chuan Turkish club tan hattrick siamin, a team hi hnehna a chanpui.

Lugano laka goal an chhuah hnuah Dzeko hian goal hnihin a chhanglet phawt a, Swiss club hian Uran Bislimi hmangin si phurh an sut ve leh. Mahse, Dzeko-a'n a la tar lo tih pholangin, minute 67-naah a hattrick siamna goal a khung a, Ferdi Kadioglu chuan a belhchhah ve leh bawk.

Swiss club tan hun pek belha Milton Valenzuela goal khungin awmzia a nei phak lo. Hetihrual hian second leg la khelh leh tur a ni a, Lugano hian phurrit lutuk nei loin Fenerbahce hi khualmualah an lenchilh thei ang.

Mourinho enkawl Fener-bahce tan pawh kawng a la thui viau - second round hi paltlang pawh ni se, Champions League group stage-a inhlangkai tur chuan third round leh playoff an paltlang ve leh phawt a ngai dawn a ni.

Kum 61 mi Mourinho hi January 2024 khan AS Roma chuan an ban a, hna nei loa a awm reng hnuin June thla khan Fenerbahce hi a zawm - kum hnih chhung atan contract ziakin, season khatah euro maktaduai 10.5 a hlawh mek.