Ederson hma hun a chiang lo - Pep

Kevin de Bruyne chhuah loh tur thu a sawi hnu lawkah Pep Guardiola a ṭawng chhuak leh ta a, tun ṭum erawh a thluk a dang - Al Ittihad nena sawizawm hlawh mek, goalkeeper Ederson chhuah dawn leh dawn loh a hriat loh thu a sawi.

City hian Ederson hi pound maktaduai 50 an chhiar nia sawi a ni a, Saudi Pro League club Al Ittihad hian heti zat hian an ngam. Pep chuan, "Kei chuan kan bula cham turin ka duh a, mahse, club dang kutah a innghat ve bawk.

"Thil awm dan tak ka hre lo a, inbiakna engmah tun hnaiah a awm lo. A pawimawh ber chu nipui transfer-te hi han inkhar se, kan hre mai ang chu," a ti - KDB chhuah loh tur thu sawitu kha a ni a, Ederson hi chu a chhuak ngei dawn niin a lang.

City hian US-ah pre-season tour an nei mek a, nimin khan Celtic chu 4-3 in an ngam lo. Scottish club nena an inkhelah hian Ederson hi bench aṭangin a lut a, Stefan Ortega chuan bul a ṭan.

Kum 31 mi Ortega hian season hmasa khan City tan match 20 lai a khel a, Ederson hi chhuak pawh ni se, German keeper hi first choice-a dah mai an tum nia sawi a ni. Nimin inkhelah hian City tan Kalvin Phillips a inlan bawk a, mahse, minute 46-naah lakchhuah a ni.

Phillips pawh hi City chhuahsan tur anga sawi a awm a, Pep chuan, "Season chawhnu lam kha a inhliam a, chuvang chuan inkhelh tam tir kan la ngam lo. Eng nge thleng dawn kan hre lo a, a dinhmun a hrechiang a, kan la hre zel ang chu," a ti a, English midfielder hi a chhuah ngei a rinawm.

US-a tour nei mek City match hmasa berah hian Erling Haaland chuan a vawi khat nan captain armband a hreng a, club academy graduate player paruk ngawtin bul an ṭan bawk.

Celtic hian 3-1 a hmahruai chungin first half an khar a, Nicolas Gerrit Kuhn chuan goal hnih khungin, Kyogo Furuhashi chuan goal khat a thawh bawk - City tan Oscar Bobb chuan goal khat a khung ve hram.

Chawlhlawk hman a nih hnuah City hian Maximo Perrone leh Erling Haaland hmangin si phurh sut mah se, Luis Palma chuan Scottish club tan goal khat a khung ve leh a, keeper thar Kasper Schmeichel hoa inlan Celtic an chak - City hian Pathianni zingah AC Milan chu friendly match an khelhpui chhunzawm leh ang.

City XI: Ortega Moreno (Ederson 46'), Lewis (Katongo 64'), Simpson-Pusey, Mbete (Doyle 46'), Wilson-Esbrand (Katongo 64'), Phillips (Susoho 46'), O’Reilly (Perrone 46'), McAtee (Ndala 46'), Bobb, Grealish (Knight 68'), Haaland (C) (Hamilton 68').

Subs: Carson, Wright, Galvez, Oboavwoduo, Heskey, Fatah, Mfuni, Samuel.