Felix-a'n goal a la khung tam ber

LZ Juice MPL11-ah team tinin vawi li ṭheuh an khel tawh a, Sihphir Venghlun striker Felix Lalruatsanga'n goal nga khungin a la khung tam ber. Serchhip tlangval hian match hmasa paliah a khung vek a, MPL11-ah hattrick siam hmasa ber a ni.

Aizawl FC winger Augustine Lalrochana leh Sihphir Venghlun winger PC Lalruatsanga ten goal li ve ve khung tawhin Felix hi an dawt a, SYS winger Ricky H. Vanlalhriatsanga'n goal thum a khung bawk.

MPL11-ah match 16 khelh a ni tawh a, goal 54 a lut tawh a, own goal pakhat awmin player 34-in goal an khung tawh a ni.