Bayern Munich leh Dortmund an chak

Bundesliga-ah champion lai Bayern Munich chuan Inrinni zan khan kai thar Arminia Bielefeld chu 4-1 in an sawp a, Thomas Muller leh Robert Lewandowski ten goal hnih ve ve an khung. Inkhel dangah Borussia Dortmund-in Marco Reus-a goal hmangin Hoffenheim 1-0 in an hneh ve bawk.

Germany manager Joachim Low-a'n 2018 World Cup zawhah Thomas Muller a koh tawh loh tur thu a sawi a, Die Mannschaft hian Muller tel loin result ṭha an neih thei chuang lo. Bayern Munich erawh Muller-a hmuh pawimawha an dah leh hnuah dinhmun sangah an ding.

Bielefelder Alm-ah Bayern tan Thomas Muller leh Robert Lewandowski ten goal hnih ve ve an khung a, Muller hian Lewy goal pakhat zawk hi a siamsak bawk. Bavarians an chak awlsam a, amaherawhchu goal li an khung hnuah Ritsu Doan-a'n Arminia tan a khung.

Bayern midfielder Corentin Tolisso chu minute 76-naah hnawhchhuah a ni a, player 10-in khel tluan mah se Hansi Flick-a hote hi nuamsa takin an chak.

Rhein-Neckar Arena-ah mikhual Dortmund-in inkhel an thunun a, Hoffenheim aiin an thiam zawk. First half aṭangin Jadon Sancho, Julian Brandt leh Gio Reyna te hmangin Dortmund-in an nawr bet a, player beiseiawm chevel a hmuhnawm hle.

First half-ah goal a luh loh hnuin second half-ah Dortmund-in Erling Braut Haaland, Marco Reus leh Jude Bellingham te an luhtir a, minute 76-naah goal an sual chhuak. Norwegian striker Haaland-a'n mahni hmasial lo takin Reus-a pe a, Dortmund captain hian goal awmchhun a khung.

Borussia Dortmund hian Thawhlehni zanah  Champions League-ah Lazio an hmachhawn ang a, champion lai Bayern Munich-in Nilaini zanah Atletico Madrid an mikhual thung ang.