Djokovic hmaah ding zo an awm lo

Flushing Meadows, New York-ah ni thum chhung chauh inlan an la nei a, thil chinfel ngai leh hmabak tam tak la awm mah se thil chiang pakhat a awm - Novak Djokovic a chesual duh lo, a hmaa dimg apiang an tlawm zel.

Nilaini zan khan Arthur Ashe Stadium-ah Djokovic a inlan, Serbian star hian darkar thum leh minute 13 chhungin Kyle Edmund chu 6-7 (5-7), 6-3, 6-4 6-2 in a hneh. Season kal laiah Djokovic hian match 25 a khelh tawhah ngam loh a la nei lo, a khingpuite lakah zahngaihna a lantir ngai lem lo.

World number 1 hian 2011 khan a zawnin match 41 chhung hnehna a lo chang tawh, kuminah erawh Covid-19 vangin tournament a awm mumal thei lo; a record lo siam tawh hi chu a khum theih a rinawm loh, chutihrualin hri leng harsaah season duhawm a hmang.

Champion lai Rafael Nadal leh Roger Federer an inlan thei lo a, a elpui ṭhin Andy Murray tel ve mah se Britain tlangval hi damkawr a nih avangin Djokovic tan hlauhawm a ni phak lo tura ngaih a ni. Novak tan rilru kamtu awm miah loin a inkhelh theih tihna a ni.

Set khatnaah Edmund che fuh zawk mah se a hnuhnung pathum chu Djokovic ta vek a ni. Serbian star hian a khingpui service chhuhsak turin a zawna point 11 hmuh changte a nei hial, a inkhelah inrintawkna a ngah tih a chiang hle.

Novak Djokovic hian third round-ah Jan-Lennard Struff a hmachhawn leh dawn. German tlangval Struff hi seeded 28-na a ni a, ani hian US Open match pahnih a khelh tawhah set hloh loin hnehna a chang thei - world number 1 hmaah erawh a boruak a danglam tawh ang.

Harsatna tawk loin Djokovic-a'n third round a lut a, media lam chuan champion tur chiangsa ang maiin an chhuah leh der tawh. Novak erawhin thil chiangsa a la awm bik loh thu a sawi, ṭul loah boruak rit insiam chawp a duh lo.

Djokovic chuan, "Tu pawhin khelh fuh ni an nei thei vek, tun ṭumah pawh khan Kyle-a'n set khatna a khel ṭha takzet, tihsual a nei duh miah lo. Khatiang reng khan khel tluang ni se chuan ka tan a harsa khawp ang," tiin a la ṭawng fimkhur hle.

Grand Slam vawi 17 champion tawh Djokovic hian a chunga awm Nadal (19 titles) leh Federer (20) te umphak a duh a, chutihrualin major title lak hnem ngawr ngawr ai chuan nuamti taka tennis khelh chu a duhdan a nih thu a lo sawi tawh bawk.

Champion tura rinkai zinga mi Alexander Zverev leh Stefanos Tsitsipas te pawhin third round an inhlangkai a, rawlthar pahnih hi world number 1 Novak Djokovic champion kalkawng dal thei tur khawpa theihna nei sang an ni.

German tlangval Zverev-a'n a khingpui tualchhung rawlthar Brandon Nakashima chu 7-5, 6-7 (8-10), 6-3, 6-1 in a hneh. Seeded pangana hian season dang ang bawkin Grand Slam-ah a la khel ṭha tawk lo, service a neih ṭhat a chhawr ṭangkai avangin hnehna a changah a ngaih theih.

Inkhel dangah seeded palina Stefanos Tsitsipas chuan Maxime Cressy 7-6 (7-2), 6-3, 6-4 in a hneh a, a match lehpekah Borna Coric a hmachhawn ang. Seeded pasarihna David Goffin pawh Lloyd Harris lakah fiahna paltlangin 7-6 (8-6), 4-6, 6-1, 6-4 in hnehna a chang ve bawk.