Eto'o-an buaina a nei nghal

Samuel Eto'o chuan tun Thawhlehni khan Everton aṭangin Sampdoria a zawm a, coach Sinisa Mihajlovic nen buaina an neih avangin a chhuak leh nghal maithei.

Pathianni khan Sampdoria chuan Serie A-ah Torino 5-1 in an hneh lo a, he inkhelah hian Eto'o pawh hun tawp lam minute 20 chhung a khel ve a ni.

Result vanga lungawi lo Sampdoria coach Mihajlovic chuan Thawhṭanni khan extra training a neih pui a, Cameroon forward hian engmah sawi lawk loin a zawm ve lo.

Mihajlovic chuan, "Engmah sawi loin training a rawn zawm lo ringawt a; hei hi keimah leh club a zah lohnaah ka ngai. Zingkar training aṭang khan ka la hmu leh lo a biak pawh kan la inbe leh lo a ni. Khawiah nge a kal a club-in engtin nge a tih dawn pawh ka la hre rih lo" tiin a lungawi loh thu a sawi.

Sampdoria boss chuan sawi chhunzawmin, "FIFA danah player pakhatin season khat chhungin club pahnih tan bak a khelh theih loh avangin Eto'o hian min chhuahsan ka ring lo" tiin a sawi.