Bolton khelmualah Liverpool

Zanin hian dar 1:15 hian FA Cup fourth round replay khel turin Bolton Wanderers khelmual Reebok Stadium-ah Liverpool an lenglut dawn a, inkhel hi Star Sports 2-ah LIVE tur a ni. Anfield-ah goal awm loin an inhnehtawk tawh a, Liverpool hi chesual thei an ni.

Liverpool hian Bolton an khelh zawhah Premier League-ah Everton leh Tottenham Hotspurs an tum chhunzawm dawn avangin manager Brendan Rodgers tan players rem khawm thiam a pawimawh dawn a ni.

Rodgers chuan, "Game khelh tur hmabak kan ngah avangin player thlan thiam a ṭul dawn. Chutihrualin squad ṭha tak kan neih avangin hnehna min chanpui thei tur player-te ka thlang chhuak dawn a ni," tiin team ṭha ber a lantir loh thu a sawi. Liverpool boss hian player inlan tur erawh a sawi lang duh lo.

Liverpool forward Daniel Sturridge-a'n thla nga chhung inhliam hnuah kartawp khan West Ham nena an inkhelh ṭumin a rawn kir a, a pet goal nghal. English forward hian starting eleven a chan rinawm chiah lo mah se field chhungah erawh a inlan ngei a rinawm.

Bolton lamin chhuan tur an nei tehchiam lo. Championship club tan Liverpool striker hlui Emile Heskey chu an player pawimawh tur a nih a rinawm a. Bolton manager Neil Lennon chuan a naupan tet aṭanga Liverpool ṭantu a nih avangin an khelmual ngeia Liverpool tum a chak thu a sawi.

Liverpool hi an chak a nih chuan Crystal Palace khelmualah February 14 khian FA Cup fifth round an khel ang a. Hemi zawh hian February 19-ah Europa League-ah Besiktas an hmachhawn zui ang. Liverpool boss Rodgers atan player hman thiam a ṭul dawn hle.

FA Cup hi Liverpool captain Steven Gerrard tan a pawimawh lehzual a, zaninah a inlan chuan Liverpool kawr ha chunga vawi 700 a inlanna tur a ni. Gerrard hian trophy nen Liverpool tana a inkhelh hun khar a duh ngei ang. Gerrard-a duhthusam ti hlawhtling turin Chelsea leh Manchester City te tlak tawhna FA Cup hi lak thu tak lehzual a pawimawh.