Australian Open thlirletna A hlui apiang an chul chuang lo
Kum khat chhunga Grand slam tournamnet an khelh hmasak ber ṭhin Australian Open khelh zawh a ni ta a, beisei loh result hmuh chang kan nei a, star chhuak thar beiseiawm tak tak an awm nual bawk.
Nadal leh Federer-te huangah Djokovic
Tunlai khawvela tennis player ropui ber pahnih sawi dawn ila, Grand slam title 17 la tawhtu Roger Federer leh Grand slam title 14 la tawhtu Rafael Nadal te aia hming lam hmasak tur an awm lo. Anni pahnih hi tennis khawvelah chuan an vawk lal len a ni ber a, Federer a champion loh chuan Nadal a champion tihna a ni mai!
Mahse, tunhnaiah Serbian star Novak Djokovic a lo lang a, kumin Australian Open-ah rin loh takin Roger Federer a tla a, Nadal-a'n a zui ve lehnghal.
Final-ah Djokovic-a'n British fa chuam Andy Murray 7-6(5), 6-7(4), 6-3, 6-0 in a hneh zui a, hei hi a grand slam title 8 na a ni a, Federer leh Nadal-te chungah awmin World no.1 a ni mek bawk. Ṭhenkhat chuan Djokovic hi Federer leh Nadal-te huangah an khung der tawh a, anni huanga tel tlak hi a ni tak tak em... Hunin a hril ang.
Tar thei lo Serena
Kum 33 a upa a ni tawh a, game physical tak tennis khel tur chuan a upa tawha ngai an awm nual. Mahse Australian Open-ah he American hian a la upa lo tih a lantir a, final-ah he tournament-a che ṭha tak Maria Shrapova chu 6-3 7-6 (7-5) a hnehin a champion. Grand slam title 19 a la tawh a, amah aia la hnem chu Stefi Graff chiah niin a ni hian 22 a la tawh.
Stefi Graff lak zat a la thei a nih ngat chuan khawvelin hmeichhe tennis player ropui ber hriatin a hre reng tawh ang.
Star thar an piang
Australian Open 2015 ah star beiseiawm tak tak an inlar a, chung zinga langsar ber tih ngam chu Madison Keys a ni. Kum 19 chauha upa a la ni a, Grand slam-ah third round aia sang a la thleng ngai lo.
Mahse, he American tleirawl hian Australian Open-ah a theihna tak tak a pholang a, Williams unaua upa zawk Grand slam title pasarih la tawh Venus Williams chu quarterfinal-ah a vaw tla a, semifinal-ah Serena hneh zo lo mah se tennis khawvelin an fak rawn. World no.1 Serena Williams chuan, "Grand slam title tam tak la turin theihna a nei a ni," tiin a fak hial.
Keys ang bawka kum 19 chauha upa Nick Kyrgios hi Australian mipui beiseina a ni. Kum 2001 a Lleyton Hewitt US Open-a a rawn champion hnu khan Australia mipui tam takin beiseina nen an thlir a, 2002-ah Wimbledon-ah a champion zui bawk a, mah se kha bak kha Grand slam title a lak belh ta lo. World no.1 hial a ni hman a, tunah chuan World no.83 a ni!
Australia mipui tana beiseina thar siamsak turin Nick Kyrgios a rawn lang a, kum 19 chauha upa niin Australian Open-ah quarter final a lut.
Andy Murray hneh zo ta lo mah se hmalam hun eng tak a nei, mah se, a nungchang erawh a insiamṭhat viau a ngai ang!
Australian Open-a a game hmasa berah nungchang mawi loh vangin dollar 4926 chawitir a ni a, quarterfinal a Andy Murray nen an intum ṭumin mawi lo takin a racquet a peih leh a, hrem ni lo mah se sawizui a hlawh hle.
Paes a chuai thei lo
India tennis an sawi apianga an sawi hmaih ngai loh chu Leander Paes hi a ni. Kum 41-a upa ni tawh mah se he Indian double specialist hian a la chuai lo tih a tilang a, hmeichhe singles player ropui ṭhin Martina Hingis nen ṭang dunin a grand slam title 15 na a la a, chawlh mai a la tum lo.