Neymar leh Di Maria ten hri an kai

Paris Saint-Germain player zingah Covid-19 kai an awm thu puan a ni a, an hming erawh a tirah chuan thup a ni. France rama chanchinbu rintlak L'Equipe tarlan danin hri kaite chu - Neymar, Angel Di Maria leh Leandro Paredes te an ni.

PSG chuan thuchhuah siamin, "Player pathumin hri an kai, midang pawh endik zel an ni ang. Season thar atan inbuatsaihna neih a ngai tawh a, hri leng karah pawh a theih ang angin training kalpui tur a ni ang," an ti.

French Football Fede-ration-in inkaih-hruaina dan a siam ang chuan, team pakhat aṭangin player pali emaw a aia tam emaw hri kai an awm a nih chuan training ṭhulh tur a ni a, an inkhelh hun pawh sawnsak tur an ni ang.

Season hmasa khan Ligue 1 champion hian a vawi khat nan Champions League final an lut a, French club dangte aiin season an hmang rei bik. August 21 aṭanga khelh ṭan tawh Ligue 1-ah pawh an match hmasa tur pahnih chu sawn hlatsak an ni hial.