I League Under 19 Mizoram Club Vs Meghalaya Club

Vawiin aṭang­in Lammualah I League Under 19 khelh ṭan a ni dawn. Ni hmasa berah Mizoram club leh Meghalaya club te an inkhel ang. Northeast zone aṭanga a sang ber chauhin final round an lut dawn.

Chawhma dar 11:00 AM-ah Chanmari FC leh Shillong Lajong te an inkhel ang a, chawhnu dar 2:00-ah Aizawl FC leh Royal Wahingdoh FC te an inkhel leh ang. Shillong club-te senior team hi I League club an ni a, Wahingdoh hi Lammual aṭanga India rama inelna sang ber khel tura in pet kai an ni. Mizoram club-te erawh I League second division club ve ve an ni thung.

Chanmari Vs Lajong

MPL2-ah Chanmari FC an champion a, tun ṭuma inkhel tur erawh an junior team an ni. Chanmari FC hian junior-ah result ṭha tak an nei - MPL1 leh MPL2 Under 17 champion an ni.

Vawiina inlan tur erawh Under 19 team an ni a, Chanmari FC an inthuam ṭha a. MPL-a kan hriat ṭhan player Vanlalbiaa, Lalawmpuia, Lalrinsanga, Sairuatkima, Lalrinchhana leh Lalhmunmawia te bakah India sub junior captain Jerry Lalrinzuala te an inlan dawn. Chanmari U19 team hi game hmuhnawm khel turin an ṭha tawk.

Shillong Lajong hi Northeast club zinga sulhnu nei ṭha ber a ni a, hmarchhak state chhuanvawr an ni. Lajong hian Mizo rawlthar ṭha an la lut a, tun ṭumah pawh hian Isaac Vanmalsawma, Lalrammuana leh Samuel Lalmuanpuia te an rawn hruai a, Mizo player-te hi Shillong club innghahna tur a ni.

Engnge an sawi?

Chanmari FC U19 assistant coach Samuel Lalrinzuala chuan, "Kan khelmualah kan khel dawn a, kan zam lo. Shillong Lajong hi hneh ngei tumin kan khel dawn. Chanmari FC hming pu nimah ila Mizoram aiawha khel tur kan ni. Mizo mipui aṭangin ṭawiawmna ka beisei a, kan ngen tel bawk," tiin a sawi.

Shillong Lajong manager Sambha Shallam chuan, "Chanmari FC khelh dan kan la hmuh loh avangin kan chak ang kan ti ngawt ngam lo. Kan team-ah Mizo player kan nei a, Chanmari hmachhawn tur hian pathum chu an inlan ngei ang. Player naupang tak tak an ni a, tun hi player ṭha zawk an nihna tura inpuahchahna ṭha tak a ni," tiin a sawi.

Lajong boss chuan sawi chhunzawmin, "Mizoram chu a nuam khawp mai, boruak a nuam a, a mi chengte an fel bawk. Ka player-te pawhin boruak vanga harsatna an nei lo," tiin a sawi.

Aizawl FC Vs Wahingdoh

Aizawl FC junior team hi first division-ah an inziak lut a, Aizawl DFA Mid Season Tournament champion thei team an ni. Chutihrualin first division-a an team-te leh vawiina inkhel tur team hi a dang hret.

Aizawl FC hian squad tichak turin Dinthar midfielder Lalnuntluanga, Mizo­ram Police rawlthar Puitea, Bethlehem Vengthlang duo Laldinsanga leh Vanlalruata te an la lut. Aizawl FC hian MPL3 an champion-na kawnga player ṭangkai ni pha Vanlalduatsanga leh Lalmuanzoa an kawl bawk. Royal Wahingdoh laka zam tur an ni lo.

Royal Wahingdoh hian Aizawl-ah sulhnu ṭha tak an nei a; I Day Football 2011-ah senior team-in final an thleng a, nikum khan Lammual aṭang hian Bhawanipore hnehin I League an thleng bawk. Under 19 team-te hian senior team-te hnung zui hi an tum a ni a, an tumna hlawhtling turin Mizo player Vanlalzuia, Vanlalzuia, Lalmuanzuala Khiangte, PC Lalhruaitluanga, Lalruatkima, Jerry Zonunsanga leh R Lalhmangaihzuala te an pawimawh ang.

Engnge an sawi?

Aizawl FC manager Nicky Malsawm­tluanga chuan, "Royal Wahingdoh hi an chhe lo turah ka ngai. Amaherawhchu, kan practice ṭha a, kan zir tur angte kan bel tawh a, I League Under 19 atan hian ṭum dang aiin kan inpuahchahna a ṭha. Kan inpeih tawh a, kan chak leh chak loh chu Pathian kutah kan innghat," tiin a sawi.

Royal Wahingdoh coach Bobby Nongbet chuan, "Mizo player kan neih avangin kan mikhual bik dawn lo. Inpuahchahna kan nei ṭha a, final round luh ngei tumin Aizawl hi kan rawn pan a ni," tiin a sawi.