Zanin dar 7:00-ah Mizoram Vs Punjab
National Games 2015-ah Mizoramin bul an ṭan ṭha a, match hmasa berah champion lai West Bengal 2-0 in an hneh. Zanin dar 7:00 hian Corporation Stadium, Kozhikode-ah Services 3-0 a sawptu Punjab an hmachhawn leh ang.
Santosh Trophy champion lai Mizoram hi National Games-ah rinkai zingah telpha mah se an khingpuite hi anmahni aia sulhnu nei ṭha vek an ni. Mizoram hian Punjab an hmachhawn hunah West Bengal an hneh ṭuma inhliam MPL2 best player R. Malsawm-tluanga an chhawr thei dawn lo. Darlawn tlangval MS-a aiah coach K. Malsawmkima'n MPL1 best midfielder Rohmingthanga emaw MPL2 best midfielder Reuben Zosangpuia emaw a luhtir ang.
Mizoram hian inhliam vangin forward William Lalnunfela an chhawr thei dawn lo a, MPL2 best forward MS Dawngliana erawh mamawh dan a zira luh tir theih a ni tawh.
Mizoram coach Mala chuan, "Kan thlenna hmun a nuam a, ground a ṭha a, boruak a nuam bawk. Kerala-in min thlen danah chuan sawisel tur ka hre lo," tiin a sawi.
Mizoram boss chuan sawi chhunzawmin, "Team dang inkhel kan thlir tawh a, a lian ṭha a, champion kalkawng a khirh dawn khawp mai. Chutihrualin zamna erawh kan nei bik lo, Mizoram tan theihtawp kan chhuah chhunzawm ang," tiin a sawi.
Mizoram hian Zirtawpni zing dar 7:00-ah Services nen group match hnuhnung ber an khel ang.