Chelsea-ah Cuadrado; Schurrle a chhuak
Premier league hmahruaitu Chelsea chuan Serie A club Fiorentina aṭangin Juan Cuadrado chu pound maktaduai 23.3-in Thawhṭanni khan an la lut. Chelsea midfielder Mohamed Salah chuan season tawp thleng atan loanin Fiorentina a zawm ve thung.
Transfer tawp ni vek hian Germany-in World Cup an champion theihna kawnga player pawimawh Andre Schurrle-a'n Chelsea chhuahsanin pound maktaduai 22-in German club Wolfsburg a zawm ve bawk.
Colombian winger chu
Chelsea player thar Cuadrado hi World Cup 2014-a Colombia star kha a ni. Colombian winger hian tun season-ah Serie A club Fiorentina tan vawi 17 khelin goal li a khung tawh.
Chelsea player thar Cuadrado chuan, "Club lian taka ka khel tur hi ka hlim em em a, chona nasa tak min petu a ni. Chelsea zawm hi ka tan chuan ka duhthusam a thleng dik a ni," tiin a sawi
Colombian winger chuan sawi chhunzawmin, "Khawvela coach ṭha ber pawl kaihhruaina hnuaia ka khel tur hi ka lawm a, player ṭha zawk ni turin min puih theih ka beisei a ni," tiin Chelsea boss Jose Mourinho hnuaia khelh a châk tawh thu a sawi.
Schurrle a kir
Cuadrado lakluh theih avangin Wolfsburg-in Chelsea winger Andre Schurrle an lak theih phah a; Wolfsburg manager Dieter
Hecking a hlim hle.
Wolfsburg manager Hecking chuan, "Andre Schurrle kan lalut thei hi ka lawm takzet a ni. World Champion team a tel tawh a ni a, kan ṭangkaipui dawn a ni," a ti.
Schurrle hian kum 2013 khan Bayer Leverkusen aṭangin Chelsea a zawm a, London club tan hian vawi 65 inlanah goal 14 a khung.
Bertrand a chhuak
Chelsea youth system chhuak Ryan Bertrand chuan loan-a a khelh mekna Southampton-ah a nghetin a lut. English left back hi official-in a man zat puanzar ni lo mah se British media lam chuan pound maktaduai 10 niin an tarlang. Bertrand hian Saints tan kum li leh a chanve atan contract a ziak.