Man City lakah Arsenal chak lo

Pep Guardiola-a'n a nau Mikel Arteta lakah harsa taka point thum an hlawhchhuah thu a sawi. Inrinni zan Premier League inkhelah Manchester City chuan Raheem Sterling-a goal khat hmangin an mikhual Arsenal 1-0 in an hneh.

League match nga an khelh chinah Gunners hi vawi hnih an chak lo der tawh, champion tura rinkai City pawhin match li aṭanga point sarih chauh an la hmuh avangin season bul an ṭan fuh bik lo. Inkhel dangah an elpui Liverpool an chak zawh loh vang erawh chuan City tan an chak hi a hlu.

Pep Guardiola-a'n Man-chester City a enkawl dawn khan a thawhpui turin Arteta a lalut a, kum thum leh a chanve chhung Etihad Stadium-ah hna thawk dunin hlawhtlinna hrang hrang an chang dun, tunah erawh na takin an inel ta.

Manager pahnihin thil danglam thlentir an tum a, player an rem danah a lang.

Arteta-a'n Willian chu tlarhma laiah a dah a, a sirah Pierre-Emerick Aubameyang leh Nicolas Pepe-te an awm thung. Hun tawp dawnah midfielder thar Thomas Partey chu dah luh a ni.

City lamah Kevin De Bruyne inlan thei lo mah se Sergio Aguero a inlan thei tawh a, Argentine striker lak chhuah a nih hnuah rin loh takin Bernardo Silva chu tlarhma laiah a awm thung; hliam vangin Aymeric Laporte leh Mendy erawh an inlan thei lo.

Player rem dan leh siksawi danah manager pahnihin 'danglam' an tum viau a, a tawpah chuan tawnhriat ngah zawk Guardiola a chungnung. 

Arteta-a'n ruahmanna siam ṭha viauah inngai mah se a hlawhtling lo, kum 2016 hnu lamah Gunners hi City muala Premier League inkhel bikah chak an nei lo.

Captain armband hrengtu Sterling-a'n an mamawh tak goal a khung a, goal a luh theih nana hlauhawm taka ball laluttu Aguero hnathawh sawi hmaih theih a ni lo. City lam hian inkhel thunun viau mah se goal khung belh theihna hun ṭha an insiam hnem bik lo.

Gunners wing back Bukayo Saka-a'n box chhunga ball a lakluh hnuah ṭha takin pet mah se keeper Eder-son chuan a lo dansak a, English rawlthar nen bawk hian an pahnih chauha an inhmachhawnnaah Brazilian keeper chu a che fuh zawk a ni - hnai takah a dansak.

Aubameyang khung tur pawh Ederson bawkin a dang, mahse Gabon international hi a lo offside thung. Arsenal lamin goal khung nuam tawk tur takah freekick vawi hnih hmu mah se David Luiz leh Pepe ten goal zawnah an pet thei lo.

Man City manager Pep-a'n squad thuam chak nan player hrang hrang a lalut hnem tawh a, a bik takin tlarhnungah sum a seng hnem. A player lak zinga fuh ber thlang dawn ila, a tira mi hriat hlawh vak lo pound maktaduai 35 senga a lei Ederson hi a ni hial mai thei.

Guardiola chuan, "Inkhel harsa takah 1-0 in kan chak, match hmasa lama Leeds kan hmachhawn ang bawkin Ederson a khel ṭha leh hle. Chhan hrang hrang vangin kan ṭhat dan takin kan la khel chhuak thei lo, hnehna kan chan vangin hma kan sawn ang," a ti.

Arteta chuan, "Man City khelmualah goal khung ngei theihna tur vawi thum kan insiam thei a, kha aia tam kha chu beisei ngam a ni lo, ka naute khelh danah khan ka lungawi," a ti a, point an hmu lo erawh hrehawm a tih thu a sawi bawk.

City an la khel dak ṭha tawk lo a, an tlar hnung a la pawp fo mai. Arsenal inkhelah hmasawnna hmuh tur a tam a, a pawimawh ber point erawh an hmu zo si lo.

Man City hian Nilaini zanah Champions League-ah Porto an mikhual dawn a, Arsenal pawhin Europa League-ah Ningani zanah Austrian club Rapid Vienna an lenchilh ve thung ang.