RVL an chak ve ta

First Division One Day Tournament 2020 khelh laiah Ramhlun Venglai chuan chak ni hmel an hmu ve ta, Inrinni khan an mahni ang bawka team talbuai lai Durtlang chu run 70 zetin an hneh.

Ramhlun Sports Complex-a inkhelah Ramhlun Venglai hi ṭhum vawrah vannei zawkin vuak hmasak an thlang a, over 38.3 chhunga run 155 tlinin an thi vek a, target sang pangngai tawk tak an siam. Durtlang lamin beisei an phak lo chhunzawm, over 37.4 thleng chu dam awm mah se run 85 chauh an siam, siam belh thei loin an thi vek - tun inelna bikah chak an la nei lo a, semifinal beiseina a thamral zui bawk.

RVL tan Michael Lalhmachhuana chuan ball 63 a hmachhawn aṭangin run 73 a vaw chhuak a, ball 60 aṭanga run 23 siamtu Lalrinfela Zadeng a thawhhlawk bawk. Lalrinfela hian over 8.4 a vawmah run sarih chauh pein wicket paruk ngawt a la thei - Player of the March atan thlan zui a ni. Vawiin chawhma dar 9:00 hian a hmun ngaiah inkhel pakhat a awm leh dawn, Kulikawn leh Chanmarians te an inhmachhawn leh ang.