Inter ngam loh Zlatan Ibrahimovic

AC Milan chuan Zlatan Ibrahimovic-a goal hnih hmangin an hmelma Inter Milan 2-1 in an hneh a, tun season Serie A inkhel ngaihven hlawh bera ngaiah point thum hlu tak an hlawh chhuak.

Inrinni zan San Siro-a inkhelah a hmuna entu 1,000 vel an awm thei a, stadium-ah thawl viau mah se a ruaka inkhelh ai chuan boruak a awm. Hun chanve hma lamin goal thum a lut kim, Ibra-a'n goal hnih a khung bakah Inter striker Romelu Lukaku chuan a khung ve bawk a ni.

Stefano Pioli naute hian league match li an khelh tawhah point 12 hmuin hmahruaitu an ni a, Serie A club zingah season kal laia la chak vek thei awmchhun an ni. Pahnihna Atalanta aiin point thumin an sang zawk.

Covid-19 vangin hun eng emaw ti chhung khung hran a ni a, mahse Milan Derby khel turin Ibrahimovic a lo kir. Swede striker palian hian minute 13-na lekah hlauhawm takin ball a lalut a, penalty a hlawh chhuak.

Ibrahimovic-a penalty pet chu keeper Samir Handanovic chuan lo dansak mah se ball per let hi Ibra bawkin a chang zui a, awlsam takin a khung. Goal luh aṭanga minute thum hnu lekah an goal hnih nan Rafael Leao siamsak a khung zui.

Inter an tlawm duh bik lo, striker Lukaku-a'n hnai tak aṭangin minute 29-naah si phurh a sut ṭhen a, winger Ivan Perisic siamsak chu Belgium international hian tauh luh theihna hun ṭha nei leh mah se goal ban hrulah a kal.

Tun hnaiah Milan aiin Inter an chungnung zawk a, tunah erawh boruak a danglam ta. Ibrahimovic chuan, "Milan hian kum li chhung zet chu Milan Derby-ah chak ni hmel an hmu lo tih ka hria, kar hnih chhung inkhunghrang hlim ni mah ila hnehna chanpui duhin ka tuihal a ni.

"Hri ka kai avang khan tlem chuan thil tui ka hriatna a nep deuh, mahse ni thum danah zel ka dinhmun endik a ni a, inkhel pawimawh ka hmachhawn theihna tur kawngah hian engmahin min dang zo lo," tiin a sawi bawk.

Ibra hi kum 39 mi a ni tawh, season hmasa chawhnu lam khan Milan hi a zawm. A contract hi season khat atan pawhsei a ni a, season kal laiah Serie A match hnih a khelh aṭangin goal li a khung leh der tawh! Europa League qualifier lamah goal khat a khung tawh bawk a ni.