Tleirawl en châkawm bikte

Khawvel huap infiamna khawmpui lian ber a ni a, mi tam takin hming an lo chher tawh ṭhinna hun pawh a ni - kumin Paris Olympic pawh hian tleirawl ṭha leh duhawm tak tak a rawn herchhuah pui leh ngei ang tih a sawi ngam.

Phoebe Gill (Great Britain) - Athletics

Kum 17 mi chauh a la ni a, tun hnai kum 40 chhungin Phoebe Gill hi British track athlete zinga Olympic hmachhawn thei naupang ber a ni dawn. June thla khan 800m intlansiakah Tokyo Games neih ṭuma palina ni phak Jemma Reekie hmaa thlengin an ram aiawh tur hian a tling. 800m hi 57.86 second chhungin a thleng thei a ni.

Summer McIntosh (Canada) - Swimming

A hming hi lo chhinchhiah rawh u! Summer McIntosh hi kum 17 mi chauh la ni mah se 400m individual medley huanga world record chelhtu a ni a, hei bakah hian 400m leh 800m freestyle huangah khawvela a chak ber dawt a ni mek. Paris Olympic-ah hian 200m butterfly leh 400m individual medley-ah a tel dawn, inelna pahnih hi world champion vawi hnih a nih tawhna a ni hial.

Anna Hursey (Great Britain) - Table Tennis

An ram tana a feh chhuah hmasak ber chuan kum 10 mi chauh a la ni a, tunah chuan kum 18 mi ni tawhin Anna Hursey hi Paris Olympic-ah a hmel kan hmu dawn. A pianna chu Wales a ni a, chumi hnuah a nu te ram China-ah an insawn, a insawm chhan hi Table Tennis khelh a zir duh vang a ni a, a naupan lai aṭanga a duhthusam leh suangtuah tih hlawhtling turin theihna leh hun remchang a ni dawn.

Emma Finucane (Great Britain) - Cycling

World leh European champion ni chungin Emma Finucane hian Paris Olympic a hmachhawn dawn - Olympic gold medal vawi hnih la tawh British cyclist Victoria Pendleton nen an khaikhin ṭhin a, tunah hian kum 21 mi ni mekin a chesual viau a nih ngawt loh chuan midang tan umphak a harsain a rinawm.

Quincy Wilson (USA) - Athletics

United States track and field huangah Quincy Wilson hi a naupang ber dawn, kum 16 mi chauh a la ni. A kum la naupang mah se mipa 400m intlansiak chu 44.66 second chhungin a thleng thei, hei hi an ram record a ni. June thla khan an ram aiawh tur hi thlan a ni a, an tlan nawn lehnaah phei chuan 44.59 second chhungin a thleng; an ram tan hian 4x400m relay a hmachhawn ang.

Abigail Martin (Great Britain) - Artistic Gymnastics

Artistic gymnast Abigail Martin hi kum 16 mi chauh la ni mah se European silver medal la tawhtu a ni a, tun ṭum inelna neih turah hian British gymnast zingah a naupang ber a ni dawn. British Championship leh 2024 Osijek World Cup-ah te hming a lo chher tawh a ni.

Lola Tambling (Great Britain) - Skateboarding

Kum 16 mi Lola Tambling hi Sky Brown nen Great Britain aiawhin skateboarding-ah an tel dawn. Brown hian kum 13 mi lek a nih laiin khawvel huapah bronze medal a lo la tawh a, kum sarih mi a nih lai aṭanga skateboarding tui tawh Tambling nen an inlan tur hi khawvelin a hmuh chak zingah an tel - Paris khawpui mawitu an nih theih ngei a rinawm.

Penny Healey (Great Britain) - Archery

Film pakhat 'Brave' tih a en aṭangin thal kah (archery) a tui ṭan a, a tui aṭanga kum 12 a liam leh meuh chuan Penny Healey chuan Paris Olympic a hmachhawn dawn ta der mai, tunah hian kum 19 mi chauh a la ni. Women's individual leh team tan a inlan dawn a, nikum khan inelna hrang hrangah a chet ṭhat avangin BBC Young Sports Personality of the Year dawn thei tura tih zingah pawh a lo tel tawh a ni.

Toby Roberts (Great Britain) - Climbing

Climbing hi Mizo pawhin kan hmelhriat ta viau, tun ṭum inelnaah pawh hian ngaihven hlawhtu kan awm nual ang. Kum 19 mi Toby Roberts hian kum thum mi a nih lek aṭangin climbing hi a ti ṭan tawh, a thisenin a ṭhan hnan a ni. British mi zingah World Cup vawi hniha inlan thei hmasa a ni a, tunah chuan a vawi khat nan Olympic a hmachhawn dawn a ni.

Quan Hongchan (China) - Diving

Kum 17 mi chauh la ni mah se Quan Hongchan tan Olympic hi thil thar a ni tawh lo, a vawi hnih nan infiamna khawmpui lianah hian a inlan dawn. Chinese diver hi women's 10m champion lai a ni a, engti zawng mahin dah hniam chi a ni lo. Tokyo Games neih lai khan kum 14 mi ni chungin record a lo siam tawh - Olympic bakah World Championship thlenga a hlawhtlin tawh avangin a ngaihtuahawm loh ang.