NBA Playoff 2020 Kobe Bryant Day-ah Lakers an chak

Los Angeles-in NBA Playoff-a an match hmasa berah Portland Trail Blazers hneh lo nghal mah se game 4 an khelh zawh meuh chuan 3-1 in hma an hruai tawh. Nimin zing khan AdventHealth Arena-ah Lakers hian 135-115 in Portland hi an hneh.

Inkhelh hun hi anni hunah August (thla 8) ni 24, zan a ni a, hemi ni hi Los Angeles-ah chuan kumin January-a thi Kobe Bryant pualin Kobe Bryant Day tih a ni. Basketball legend Bryant hian jersey number 8 leh 24 a ha ṭhin.

Los Angeles Lakers hian bul an ṭan ṭha a, inkhelh ṭantirh hian 15-0 a ni hman. First quarter-ah hian 24-8 nih lai a awm a, hei hi Kobe Bryant-a hak ṭhin number chiah a ni. LeBron James chuan, "Ka hawi chhuak a, scoreboard ka en chuan 24-8 a lo ni a. Inkhelhna hmunah Bryant hian min awmpuiah ka pawm thlap," tiin inkhelh banah a sawi. Lakers hian Black Mamba hminglem an pek Bryant-a hriat reng nan jersey dum an ha a, Portland Trail Blazers guard Damian Lillard pawhin Bryant pualin a pheikhawkah 8 leh 24 a chhu kai bawk.

Western Conference-a seeded number 1 Lakers hian first quarter-ah 43-25 in hma an hruai a, halftime-ah 80-51 a nih tawh avangin hnehna an chan kawngah harsatna an tawk lo.

Lakers chak nan an thiampuipa LeBron James a che ṭha leh hle. Kum 35 mi James hian minute 30 chhung lekin point 30 a neih bakah assist vawi 10 a nei a, rebound vawi ruk a la bawk. LeBron hi Kobe Bryant hnua playoff-a match zawna point 30 khung leh thei hmasa ber a ni a, NBA history-a playoff point 7000 khung tling thei hmasa ber a ni bawk. Player dang zawngah playoff-ah ringawt point 6000 nei phak an awm loh avangin LeBron-a record hi a ropui hle.

Lakers hian Playoff-ah 3 point luh an harsat a, game 4-ah erawh vawi 39 aṭangin player pasarihin vawi 17 an lut. Kyle Kuzma-a'n vawi kua aṭangin vawi  nga a lut a, Lakers tana 3-points lut hnem ber a ni.

LeBron James-a'n vawi 4 a lut a, Danny Green (3), Kentavious Caldwell-Pope (2), Alex Caruso (1), Markieff Moris (1) leh JR Smith (1) ten 3 points an nei vek. Lakers hian regular season-ah 3 points 

aṭanga vawi 16 luh vawi nga an nei a, tun ṭumah erawh vawi 17 an lut thung.

Anthony Davis-a'n third quarter-a minute 9:21 a la awm tihin a hnung a ti na a, a inlan tawh lo. Heti chung hian Davis hian point 18 bakah assist leh rebound vawi nga ve ve a nei hman. Inkhelh banah August 27, Ningani zing dar 6:30-a game 5 an khelh hunah inlan theih a beisei thu a sawi.

Eastern Conference-ah semifinal khel tur a hriat kim hnai a, Milwaukee Bucks-in nimin khan Orlando Magic 121-106 in an hneh. Giannis Antetokounmpo-a'n Bucks tan point 31 a nei a, rebound vawi 15 a la.

Bucks hian 3-1 in hma an hruai a, seeded number 1 hi semifinal lut ngei tura ngaih niin semifinal lut team dang pathum a hriat tawh bawk. Nimin vek khan Miami Heat chuan India Pacers 99-87 in an hneh a, 4-0 in series an la. Bucks hian hnehna an chang a nih chuan semifinal-ah Heat nen an inhmachhawn ang.

Boston Celtics leh Toronto Raptors ten an khingpui Philadelphia 76ers leh Brooklyn Nets 4-0 ve ve in an hneh a, team pahnih hi semifinal-ah an hmachhawn dawn. Nimin zing khan Oklahoma City Thunder leh Houston Rockets te hun pangngaiah an inhnehtawk a, overtime-ah Thunder 117-114 in an chak. Rockets leh Thunder hi 2-2 in an inhnehtawk a, Western conference-a semifinal lut tur hriatthiam a la har hle.