Sum hmang tam Chelsea la che fuh lo Tlarhma hmuhnawm = Tlarhnung pawp

Stamford Bridge-ah Chelsea-in attacking game hmuhnawm tak an lantir a, goal thum tehmeuh khung mah se an tlarhnung a pawp avangin Southampton lakah goal thum tho an chhuah. 

Frank Lampard-a hote hi Inrinni zan khan Saints nen 3-3 in an inhnehtawk a, nipui transfer a pound maktaduai 200 chuang hmangtu team hian match nga aṭangin point riat chiah an hlawh chhuak.

Chelsea hian Thawhlehni zanah Europa League champion Sevilla an mikhual dawn. Blues hi Champions League group E-ah Sevilla, Rennes leh Krasnodar te nen group khatah an awm a, knockout stage luh harsa tur niin a lang lo.

Chelsea keeper thar Edouard Mendy a inhliam avangin Kepa Arrizabalaga-a'n bul a ṭan a, league match hnuhnung bera Crystal Palace laka bul ṭan lo Andreas Christensen, Mason Mount leh Christian Pulisic ten bul an ṭan.

Lampard hoten Eagles an hneh ṭumin goal an chhuah lo a, goal li zet an khung. Hemi ṭuma tlarhnunga player pawimawh pahnih Mendy leh Thiago Silva an chhawr theih loh chhan hi international break vang a tih theih. Kum 36 mi Silva hi Brazil tana inlanin South America-ah a zin avangin awltir a ni.

Southampton manager Ralph Hasenhuttl-a'n inkhelh hmain RB Leipzig-a a enkawl tawh Timo Werner a fak a, German forward hian a pu hlui hmaah a theihna tak a pholang.

Kum 24 mi Werner hian minute 13-na lekah Ben Chilwell-a cross chu a tauh lut a, Premier League-a a goal hmasa ber khungah inngai mah se offside vangin pawm a ni lo.

Germany international forward Werner hi a vanduai rei lo a, minute hnih hnuah Chilwell  aṭanga a ball hmuh chu tlan helin mawi zetin Saints defender Jan Bednarek a tlan pel a, vei lama la tura an ngaih ṭhup laiin defender tamna lamah khalh zelin box chhung aṭangin a pet goal.

Werner hian minute 28-naah Jorginho aṭanga a ball hmuh chu keeper Alex McCarthy pet khum nan hmangin a tauh goal zui a, a thiam tih nemnghehin a awm. Chelsea-in Werner chauh an kawl lo a; Mount, Kai Havertz leh Pulisic te an neih bawk avangin an goal nawr a na hle.

Chelsea tlarhma tih ṭhat chu tlarhnung phui tawk loh leh fimkhur loh avangin engmah lo maiah a chang. Havertz-a'n hun lo taka ball a hloh avangin Danny Ings-a'n minute 43-naah ṭha zetin a pet goal. 

Minute 57-naah defender Kurt Zouma back pass sual chu Che Adams-a'n um lutin Kepa-a'n a tih tur a ti tawk lo a, buai nuaih karah Saints forward hian chiang zetin si phurh sutna goal a khung.

Chelsea talent neih ṭhazia a lang zui a, minute 59-naah Pulisic leh Werner-a thawhrah sengin Havertz-a'n a tihsual thup nan cool takin a pet goal. Awlsam takin Blues an chak dawnin lang hman mah se injury time-ah an ṭang zo lo.

Saints forward Theo Walcott-a volley luh chu Jannik Vestergaard-a'n tauh pial zeuhin Ralph Hasenhuttl hoten siphurh an sut.

Kum 28 mi Vestergaard hi Mizote chuan kan la hre awm e - Hoffenheim hminga Lammuala rawn inkhel tawh kha a ni. Danish defender goal khung avang hian Frank Lampard-a hote tan indawm kun mai loh chu tih theih dang a awm lo.

Chelsea boss Frank Lam-pard chuan, "Goal chhuah lohna turah kan chhuah. Mimal tihsual vangin kan khingpuiten beiseina an neih phah. Team angin hmasawn kan mamawh a, goal chhuah loh kan duh," tiin tlarhnung siamṭhat a duh thu a sawi.

Blues hian tun season Premier League match nga aṭangin goal kua an chhuah der tawh. Lampard-a hnuaiah hian league match 43 khel tawhin goal 63 an chhuah a, Chelsea manager zinga record nei chhe ber a ni. 

London club hian Sevilla an hmachhawn zawhah October 24, Inrinni zan khian inkhel pawimawh takah Manchester United an hmachhawn ang.