Liverpool coach hlui Gerard-a'n NorthEast a zawm

Indian Super League club NorthEast United chuan coach thar atan Gerard Nus an lalut a, kum 35 mi coach hi Liverpool coaching team zinga lo tel tawh ṭhin a ni. 

Liverpool academy aṭanga a coaching career ṭantu Nus hian Croatian coach lar Robert Jarni a thlak dawn a, Jarni hian beisei ang result a pek theih loh avangin February khan Highlander hi a chhuahsan. 

Jarni-a chhuah hnuah assistant coach Khalid Jamil chuan NorthEast United enkawl hna hi a thawk a, Nus an lakluh takah chuan Aizawl FC boss hlui hian assistant coach hna bawk a chelh chhunzawm ang. 

UEFA Pro License nei Nus hian Brighton & Hove Albion leh Melbourne Heart-ah te pawh assistant coach hna a lo chelh tawh a, Ghana national team-ah Avram Grant-a thachhang dawltu a lo ni tawh bawk. Spanish club Rayo Vallecano technical director hlui hian season hman zawh takah khan Swedish second division club AFC Eskilstuna a enkawl a, Highlander hian ISL-ah playoff a thlenpui theih an beisei ang. 

Kum 35 mi Gerard Nus hian Ghana national team-a coaching staff zinga a tel laiin a hlawh an bat ṭhen avangin a thlenna hotel-a lo chhuahsan duh lo lui tawh a, hetihlaia a nawrhna hian football khawvelah ngaihven a hlawh hle.