Maddison leh Mendy ten contract pawtsei

Leicester City mid-fielder pahnih James Maddison leh Nampalys Mendy te chuan contract thar an ziak a, club lian dangin an hel lai player an thlung nghet thei hi Foxes tan chanchin ṭha a ni ang.

England international Maddison hian season li daih contract a ziak a, kum 28 mi Mendy hian June thla khan a contract neih lai a hmang zo a, season a kal laklawh avangin inrem lailawkna an nei - tunah chuan season hnih daih rinawmna thu hi a ziak ve leh ta a ni.

Foxes manager Brendan Rodgers chuan, "Season tharah European football kan khel dawn, chumi atana ṭangkai tur player tawnhriat nei ṭha kan chelh thei hi a lawmawm takzet," a ti. Season liam ta khan Rodgers-a naute hi Premier League-ah pangana an ni a, Europa League an khel dawn.

Kum 23 mi Maddison hian Norwich City aṭangin 2018 khan Leicester City hi a zawm, a season hmasa ber hian an club Young Player of the Season atan an thlang; a club tan hian inelna hrang hrangah match 76 khel tawhin goal 16 a khungsak tawh bawk.

Maddison chuan, "Leicester City ka zawm tirh aṭang khan engkim mai hi a nuamin a kaltluang em em vek, ka chungah fans an ṭhain khelmual chhung leh pawn lamah pawh hun nuam tak ka hmang. Club hian hmasawn zel a tum, chumi ti hlawhtling tur zinga ka tel ve hi ka lawm," a ti.