Zaninah MSL khel tur a hriat dawn ta Tuikual South Vs Chawnpui VR4

Mizoram Super League khel tur a chiang dawn ta. Zanin dar 6:30-a Tuikual South leh Chawnpui VR4 chak zawkin MSL an khel dawn.

Zarkawt Recreation Center-ah MSL Playoff Final khelh a ni dawn a, ṭhutna a tam loh avangin en duh zawng zawng an leng vek dawn lo - ṭhutna chang duh tan kal hma tur a ni.

Bethlehem an tla

Bethlehem-in Thawhlehni zanah Chawnpui VR4 77-67 an hneh loh avangin MSL khelh ngei an tumna chu a thamral ta.

Bethlehem hian league stage-ah Chawnpui VR4 65-73 in an lo hneh lo tawh a, phuba lakna chance an bawhpelh. Bethlehem lamah ARC aṭanga an lak Tinku Singh a che ṭha hle. Manipur player hian point 29 lai hlawhchhuak mah se, a team-te chakpui zo chuang lo.

Chawnpui VR4 erawh team angin an che ṭha a, point 22 neitu Lalnunmawia’n a score hnem ber. Chawnpui hian ṭantu an nei ṭha a, Bethlehem ṭum hnih hneh theitu hi team ṭha an ni.

Tuikual South an fimkhur

MSL playoff boruak a awm ṭan tirh aṭangin Tuikual South thawm a na nghal hle. Vengchhung mipui in an ṭawiawm ṭha a, NGO te an ṭangrual a, sum pawh an inseng nasa. Player ṭha an la lut hnem a, harsatna nei loa ‘Playoff Final’ an lut hi a mak lo.

Tuikual South tan feet ruk leh inches ngaa sang Rakesh Sawant hi an in­nghahna a ni. Tin, captain F.Zodinthara leh KC Lalliantluanga te sawi hmaih chi an ni lo. Player ṭha pahnih hian MSL khelh loh huamin Tuikual South an zawm a, KC-a erawh coach a nih tel avangin an chak lo a nih pawhin MSL a la enkawl thei tho ang.

Tuikual South captain Dina chuan, “League stage-a kan lo hneh tawh vang ngawtin kan zuam hran lo. Final a nih vangin a boruak a sang tawh dawn a, chetsual theih a ni tih kan hria, fimkhur takin kan khel dawn,” tiin a sawi.

VR4 an zam lo

MSL playoff khelh ṭan tirhah Chawnpui VR4 thawm a na hran lo. Court chhunga an thawm erawh a dang daih; MSL khel thei turin theihna an nei. League stage-ah Tuikual South 63-78 in an hneh lo a, amah­erawhchu Bethlehem BC ṭum hnih an hneh avangin inrintawkna an nei thar a. Tuikual South an zam mai bik lo a, MSL khelh an tumruh hle.

League stage leh semifinal-ah Chawnpui VR4 tan Lalnun­mawia Sailoṭangkaizia kan hmu a, K.Vanlalruata’n innghahna tlak anih zia a tilang tawh bawk. Tuikual South tan anni pahnih hi ven uluk ngai tur a ni ang.

Chawnpui VR4 manager Laltlanmawia chuan, “League stage-ah Tuikual South hi hneh lo mah ila kan huphurh lo. Final boruak a dang daih a, kan chak thei tih kan hria,” tiin a sawi.

Chawnpui manager hian K.Van­lalruata, Lalnunmawia leh Lianhmingmawia te an chet ṭhat a pawimawh thu a sawi tel bawk.