Zverev hnehtu Andy Murray

Andy Murray chuan a hliam a dam chiang tawh tih a lantir. Britain tlangval hian nimin zing khan Alexander Zverev hnehin Western and Southern Open-ah last 16 a inhlangkai.

New York khawpuia inkhelah kum 33 mi Murray hian 6-3, 3-6, 7-5 in hnehna a chang, a match lehpekah chuan Wimbledon finalist hlui Milos Raonic nen an inkhel leh ang. Inkhel dangah Raonic hian British number 1 Dan Evans chu a lo hneh ve thung.

Grand Slam vawi thum champion tawh Murray chuan, "Hun rei tak chhung ka inkhel mumal thei lo a, chumi hnuah player ṭha tak ka hneh ve leh thei hi ka tan chuan chanchin ṭha a ni," a ti. Khelbawr leh hnungzâng na vangin season thum vel a inkhel mumal thei tawh lo a ni.

Inkhel dangah Novak Djokovic chuan player langsar ni lem lo Ricardas Berankis chu 7-6 (7-2), 6-4 in a hneh hram. Serbian tlangval hian a nghawngah hliam tenau a nei a, doubles huangah phei chuan a inhnuhdawh phah.

Singles match khel mah se Djokovic a la dam chiang lo tih a lang, inkhelh laklawh laiin enkawl a ngai. Djokovic chuan, "Ni li chhung vel ka in enkawl tawh a, zawi muangin hma ka sawn ve zel," a ti. World number 1 hian US Open pawh khelh zui theih ngei a la inbeisei.

Champion tura rinkai zinga mi Dominic Thiem chuan beisei a phak lo. Austrian tlangval hi Djokovic hnungah seeded pahnihna pek ni mah se a khingpui Filip Krajinovic lakah 6-2, 6-1 in a chak lo nghal.