Vawiinah MPL4 Playoff Reitlang FC Vs Upper Republic FC
Mizoram Premier League Season 4 atan hmunruak pakhat a la awm. Vawiin tlai dar 2:00 hian Lammualah MPL3 pasarihna Reitlang FC leh MPL4 Qualifier-a pahnihna Upper Republic FC te an inkhel ang.
Reitlang FC-in MPL khel zel turin Republic khelmualah zing karah an inpuahchah a, he khelmualah vek hian Upper Republic FC-in tlai lamah an practice thung. Training-na hmun nei ṭha zawk an awm lo a, Lammualah a ṭha zawk zawn tur a ni.
Qualifier pahnihna
Upper Republic FC-in MPL4 Qualifier-a an game hmasa berah Luangmual FC 2-6 in an hneh lo a; an game hnung pahnihah erawh an khingpui an sawp ve ve. Upper Republic FC-in Electric FC 6-1 a an hneh hnuin Zotlang FC 3-1 in an hneh leh a, Qualifier-ah pahnihna an ni.
Qualifier khelh hma hian Upper Republic hian Aizawl DFA Season Opening Tournament-ah an champion a, hemi zawh hian Halflong-ah an champion leh bawk. Tuna Upper Republic suangtuahna chu MPL4 khelh a ni.
Upper Republic-in vawiinah an player pawimawh pathum an chhawr thei dawn lo. Tlar hnung lama bang rinawm captain Lalremtluanga leh Siarhruaia bakah midfield laia game kaihruaitu Israel Ramhmachhuana te chu inhliam vangin an inkhel thei dawn lo.
Upper Republic enkawltute'n Reitlang hneh turin uluk taka team siksawi a ṭul dawn a ni.
MPL3 pasarihna
Reitlang FC-in Phillipe de Ridder-a hnuaiah MPL3 an ṭan a, result ṭha neih loh vangin Belgian coach banin veteran coach R. Lalrinsanga an la lut. Reitlang hi Lunglei FC chungah awmin MPL3-ah pasarihnaah an awm a, MPL khel zel turin playoff an hmachhawn a ngai.
MPL3-ah Reitlang FC hian vawi khat chiah chak an nei a, draw vawi thum neiin vawi 10 an chak lo. Reitlang hian Liberia forward Abraham Bobby Fanny bakah Cameroon player Patrick Arol Enondji, Cho Tsering Lepcha leh Hirok Saha te nei chungin match 14-ah goal nga chiah an khung a, goal 28 an chhuah bawk. Playoff-ah foreigner leh state pawn player tel loin an khel dawn a, chak lo thei an ni.
Eng nge an sawi?
Upper Republic president R. Lalhrilliana chuan, "Game chu a sawi lawk theih lo a, inhliam nei chung pawhin kan hlau bik lo. Theihtawp chhuahin chak tumin kan khel ang," tiin a sawi.
Vanglaini palai zawhna chhangin Hrila chuan, "Luangmual FC ai chuan Reitlang FC hmachhawn chu kan duh zawk. Luangmual hi tun season-ah first division ni mah se Reitlang aiin an ṭha zawkin ka hria," tiin a sawi.
Reitlang FC hian Under 17 team enkawltu Johny Lalawmpuia'n hnuaiah training an nei a. Republic Veng tlangval hian a inkhelh hun laiin Kolkata club Mohammedan S.C. leh Mohammedan A.C. tan a lo khelh tawh a ni.
Coach Lalrinsanga remchan loh avanga Reitlang enkawl lailkawtu Johny chuan, "Theihtawp chhuahin kan khel ang. Tlin leh ngei kan tum. Kan dinhmun thlirin first division club an nih avanga zuam ngawt thei kan ni lo," tiin a sawi.
MPL PLAYOFF THLIRLETNA
MPL1 Playoff
MPL ṭan hma season-a MFA hnuaia first division club Dinthar FC, FC Kulikawn, Luangmual FC leh Mizoram Police FC te'n MPL1 khel turin an tling nghal a; hmuruak pali dang khel turin Aizawl FC, Chanmari FC, Chanmari West FC, College Veng FC, Kanan FC, FC RS Annexe, Theiriat FC leh Reitlang FC te'n MPL1 Playoff an khel a. Team pariatte'n vawi khat ṭheuh an khelh kual hnuah Mizoram Premier League hmasa ber khel turin Aizawl FC, Chanmari FC, Reitlang FC leh FC RS Annexe te an tling.
MPL2 Playoff
Luangmual FC-in MPL1-ah pasarihna an nih avangin MPL2 khel turin playoff khelh a ṭul. Luangmual hian MPL2 Playoff-ah Khawzawl FC an hmachhawn a, first leg-ah 4-1 a hnehin second leg-ah 2-2 in an hneh tawk. Aggregate-ah Luangmual 6-3 in an chak.
MPL3 Playoff
Chanmari West FC-in MPL2 Qualifying aṭanga MPL khel tura an tlin hnuin pasarihna a ni a, MPL3 Playoff-ah Bethlehem Vengthlang FC hnehin an tling nawn. West Warrior hian first leg-ah 3-2 in Aizawl DFA first division champion BVT FC an hneh a, second leg-ah goal awm loa inhnehtawk a; aggregate-ah Chanmari West 3-2 in an chak.
BVT hi an vannei zui tho a, MPL2 final thleng thei Luangmual FC chu supporter-te chet mawi loh vanga hrem an nih avangin MPL khel turin an tling ta tho.