United-in Cambridge an hneh

Old Trafford-ah Cambridge United striker Tom Elliott-a'n inkhelh ṭan tirhah goal ban a pet per nghal a, hun tawpah erawh Manchester United 3-0 in an chak.

Thawhlehni zan khan FA Cup fourth round replay-ah Manchester United-in Juan Mata, Marcos Rojo leh James Wilson te goal hmangin League Two club Cambridge United an hneh a, fifth round-ah Sheffield United hnehtu Preston North End an hmachhawn ang.

£231m Vs £0

Manchester United-in starting eleven-ah David de Gea an hmang a, Victor Valdes-a'n khelhna hmun a chang lo chhunzawm zel. Spanish keeper bakah Wayne Rooney, Robin van Persie leh Angel di Maria te starting eleven-ah telh an ni a, United tana bul ṭan player 11 man zat pound maktaduai 231 a ni.

Cambridge starting eleven-ah Luke Chadwick a rawn tel a; Chadwick-a'n Old Trafford-a a khelh hnuhnun ber chu United-in November 2002-a Bayer Leverkusen 2-0 a an hneh ṭum kha a ni. League Two club starting eleven zinga player sawm hian man a nei lo a, player pakhat hi loan a lak a ni.

Cambridge hian replay an hlawhchhuah avangin pound maktaduai khat bawr vel an hlawhchhuah rin a ni a, Old Trafford-a mipui 74,511 zinga mipui 6,600 chu anmahni ṭan tura Manchester-a zin an ni.

Inkhel chu

Traffic harsatna vanga minute 20 chhung inkhel tih khawtlai a nih hnuah inkhelh ṭan a ni.

Dutch midfielder Daley Blind-a pass sual vangin Elliot-a'n chance a nei a, Cambridge forward hian goal ban a pet per - United an him.

United-in inkhel an thunun zui a, field sir lama tlan Rooney leh Di Maria te ball an pet tam a, a rah chhuah chu goal a ni. Vei lam aṭanga Di Maria cross chu Marouane Fellaini-a'n tauh thlak hnuah Mata-a'n minute 25-naah goal hmahruai a khung.

Minute sarih hnuah Van Persie chip pass chu Argentine defender Rojo-a'n a tauh goal a, first half-ah 2-0 a ni.

Second half-ah United an chungnung zel a, Van Persie goal khung tur chu keeper Chirs Dunn-a'n a dang ṭha hle.

Hun tawp lamah Cambridge player-te an tlan tam avangin an chau tih a hriat a. Minute 73-naah Van Persie thlaktu Wilson chuan United goal thumna a khung a. 3-0 in inkhel a tawp.

Eng nge an sawi?

Manchester United boss Louis van Gaal chuan, "Cambridge kha an khel ṭha em em a, an huaisen a, field chhungah an inrem dik bawk. Tin, an supporter-te thawm kha a ṭha em em a ni," tiin an khingpui team a fak.

Dutch manager chuan sawi chhunzawmin, "FA Cup hi kan champion theihna chance ṭha ber a ni. Champion turin vawi li chak a la ngai dawn," tiin FA Cup champion a tum thu a sawi a, an khingpui leh tur Preston North End khelh an awlsam loh thu a sawi.

Cambridge manager Richard Money chuan, "First half-ah 2-0 in kan chak lo a, khati chung khan discipline ṭha tak nen second half kan khel thei a, ka player-te ka chhuang hle. First half-a kan goal chhuah dan kha a ho deuh a, amaherawhchu ka player-te ka dem thei lo. Kan inṭhat hleih deuh a ni," tiin a sawi.

Preston an comeback

Sheffield United-in an khel­mualah minute 38-naa Jamie Murphy goal hmangin hma an hruai a, first half-ah 1-0 a ni.

An inkhelh hmasak zawk ṭuma freekick mawi taka khungtu Preston Northend midfielder Paul Gallagher-a'n minute 63-naah an siphurh a sut a; minute ruk hnuah Paul Huntington-a'n a tauh lut leh a, minute 73-naah Gallagher-a'n penalty aṭangin a khung leh bawk.

Hun tawpah-ah second half-a goal thum khungtu Preston 3-1 in an chak.

Preston manager Simon Grayson chuan, "Hun harsa tak kan paltlang hnuah result ṭha kan nei leh ta. Manchester United kan hmachhawn thei tih kan hriat khan phurna nasa tak minpe a ni," tiin a sawi.

Sheffield United boss Nigel Clough pawhin Manchester United a hmachhawn lo tur chu a pawi a tih thu a sawi ve bawk.