Sunderland-in Fulham hnawtchhuak

Thawhlehni zan khan FA Cup fourth round replay inkhelah Sunderland chuan Championship club Fulham 3-1 in an hneh a, fifth round-ah League One club Bradford City an hmachhawn ang.

Craven Cottage-ah Fulham-in record an nei ṭha a, an khelmuala an inkhel hnuhnung 13-ah vawi riat hnehna an chang. FA Cup-ah erawh an record ṭha tak hi Sunderland lamah an chawi nung thei lo.

Fulham-in minute 28-naa Hugo Rodallega goal hmangin hma an hruai a, bul an ṭan ṭha hle. Rodallega hian December 13 hnua a goal khung leh hmasak ber a ni. Chawlhlawk laiin mualneitu lam hian sikhat faiin hma an hruai a, Premier League club Sunderland an talbuai hman hle.

Second half-ah Sunderland lamin lehthal ngei tumin an nawr let a, an vannei tel bawk. Minute 61-naah Fulham keeper Marcus Bettinelli chuan an lamah a ti lut a, an inkhelh hmasak zawk ṭuma cheṭha tak Bettinelli vanduaina hi Sunderland tiphurtu a ni.

Sunderland an chungnung chhunzawm a, minute 75-naah Ricardo Alvarez-a'n Black Cats hmahruaina goal a khung a. Injury time-ah Jordi Gomez-a'n penalty hmangin mikhual chakna a nemnghet zui a ni.

Fulham hian kum 2011 huah FA Cup fifth round an la thleng leh lo a ni.

Sunderland manager Gus Poyet chuan, "Inkhel kan thunun a, chak zawk nih kha kan phu a ni. A pumpuia thlirin kan khelh danah ka lungawi a, ka naute inkhel hmuh nuam ka ti hle," tiin a sawi.

Sunderland boss Poyest sawi ang hian Black Cats hian inkhel an thunun a, ball possession 60% an neih bakah goal zawnah vawi 17 an pet bawk.