Arsenal-ah Mari leh Soares an nghet

Arsenal chuan loan hmanga an hawh lai defender pahnih Pablo Mari leh Cedric Soares te chu an la nghet a, an contract rei zawng leh hlawh tur zat chu tarlan a ni lo.

Spanish defender Pablo hi Brazilian club Flamengo aṭanga lak a ni, coach Mikel Arteta-a'n tlarhnung laia khel turin a duh - season hmasa pawh khan chhawr tum viau mah se hliam vangin a buai; season thar tir lamah pawh a inlan thei lo ang.

Portuguese defender Cedric hi Premier League club Southampton aṭanga lakluh a ni thung. Portuguese club Sporting Lisbon aṭanga inzir chhuak hian ram leh club tan tawnhriat a nei ṭha tawh - Hector Bellerin nen khelhna hmun an inchuh leh dawn.

FA Cup champion Gunners hian Arteta kaihhruaina hnuaiah indin thar an tum mek, winger Willian chu free transfer-in an lalut tawh. Ligue 1 club Lille aṭangin defender Gabriel Magalhaes chu an lalut dawn hnai bawk.

Khawthlang media lamin an tarlan dan chuan Gunners hian Gabriel hi inremna an neihpui tawh, Italian club Napoli leh Manchester United pawhin an ngaihven defender hian season nga daih contract a ziak ang.