Bayern Munich an chak zo lo

Bayern Munich-in Wolfsburg laka 4-1 a an mualpho hnu lawkah an khelmual Allianz Arena-ah FC Schalke nen 1-1 in an inhnehtawk.

Thawhlehni zan inkhelah ṭan aṭanga minute 20-na lekah Bayern defender Jerome Boateng-a'n Schalke forward Sidney Sam a tih tluk vangin penalty a chawi a, hnawhchhuah a ni zui. Penalty pet turin Eric Maxim Choupo-Moting a rawn pen chhuak a, World Cup 2014 best goalkeeper dawngtu Manuel Neuer-a'n a dan sak.

A tlem zawk nichungin Bayern-in ball an chang tam zawk a, minute 67-naah Xabi Alonso siamsak chu Dutch winger Arjen Robben-a'n goal-ah a chantir. Bayern an lawm rei lo, minute nga hnuah Schalke-in an captain Benedikt Howedes hmangin an si phurh a rawn sut a, hun tawp thlengin goal a luh belh tawh lo.

Inkhel dangah VFL Wolfsburg-in an khingpui Eintracht Frankfurt nen 1-1 an inhnehtawk avangin Bayern nena inthlauhna hi point riat a ni chhunzawm zel.

Bayern coach Pep Guardiola chuan, "Kan result-ah hian lawm lohna tur ka nei lo, minute 70 chhung chu a tlem zawk ni chungin kan khel a, a awlsam lo a ni," a ti.

Bundesliga champion lai coach chuan sawi chhunzawmin, "Game kan thunun a, chance ṭha tak tak kan insiam a, Wolfsburg kan khelh ṭum ai kha chuan hma kan sawn tawh hrim hrim. Penalty aṭanga goal an rawn khung loh avang khan kan vannei hle a ni," tiin a sawi.