Mizoram leh Meghalaya club inhnehtawk

Nimin khan Mizo­rama a vawi khatna atan Under 19 I League match an khel ta a, Chanmari FC leh Shillong Lajong goal awm loin an inhnehtawk a, Aizawl FC leh Royal Wahingdoh-te 1-1 in an inhnehtawk bawk.

Lammuala inkhel hi February 7-ah chhun­zawm leh tur a ni.

Chanmari FC an him

Chanmari FC hi club ṭhangduang tak ni mah se club naupang tak an ni a, I League rimnam inkhela an vawi khat inlanna a ni. Northeast aṭanga I League-a kai hmasa ber leh tawnhriat ngah ber Lajong an hmachhawn a, goal awm loin an inhnehtawk - Lajong hi a game-ah an chungnung hret.

Lajong lamin tlar hmaah Mizo rawlthar Lalrammuana leh Samuel Lalmuanpuia an dah a, Muana hi a hriamin vawi tam tak amah vengtu a tlan pêl thei a, first half-a player hmuhnawm ber a ni hial ang.

Chanmari FC lamin chance ṭha an neih chu Lalawmpuia'n a hlah a, he player vek hian second half-ah tauh luh theih tur a hlah bawk. Lajong hian nawr viah mah se, clear chance an hmu tam bik lo a, second half-a lut Isaac Vanmalsawma'n ho takin a hlah.

Hun tawp lamah Lajong an hlauhawm tawlh tawlh a, an defender Mebankhraw Wahland leh Nabin Rabha-te an khawng ṭhat avangin Chanmari FC tan hla tak aṭanga pet mai loh chu tih theih a awm lo.

Injury time a ni tawh a, Isaac chuan ball lalutin goalkeeper chiah a awm tawh tihah Hardy Nongbri a pe phei a, goal ngei tura a pet chu Chanmari keeper Lalremruata'n a dang hman hlauh a, point khat ve ve an insem.

Engnge an sawi?

Chanmari FC coach Lalsangzuala Hmar chuan, "First half-a goal kan khung loh vang khan ka player-te an hnual a ni. Pass sual kan ngah lutuk a, game plan kan la bel tawk lo. Ka naupang-te kha ni 25 chhung training ka pe a, Lajoing erawh kum tluana training nei a nih avangin an game plan an bel zawk a ni," tiin a sawi.

Chanmari boss chuan, "Wahingdoh leh Aizawl FC-te an inhnehtawk ve tho a, tlang theihna chance ṭha kan la neiin ka hria," tiin a sawi.

Shillong Lajong manager Sambha Shallam chuan, "Match hmasa ber a nih avangin khelh a harsa deuh a ni. Kan khel ṭha thawkhatin ka hria, kan khelh leh hunah chuan a danglam tawh ang. Wahingdoh leh Aizawl FC an inhnehtawk hlauh a, a lawmawm khawp mai," tiin a sawi..

Aizawl FC 1-1 Royal Wahingdoh

Aizawl FC hi I League Under 19 leh Second Division I League lama tawnhriat nei ṭha an ni a, I League tling thar Royal Wahingdoh an tum a, inkhel hmuhnawm takah goal khat ve ve an thun.

Aizawl FC a tir lamah an buai a, mikhual team-in an nawr a, Mizo player panga awmna RW hian a tirah an thun teuh hle a, Lalmuanzuala'n chance a hlah. Aizawl FC midfielder Lalnuntluanga freekick pet chu a lut teuh viau bawk a, Johnathan Lalruatkima'n corner-a a tauh phei chu RW lamin goal line aṭangin an lo pet chhuak hram.

Half time a ni dawn tawh a, a bet zawk Aizawl FC-in counter attack aṭangin mawi zet maiin goal an thun - Rochharzela ball pek fing tak chu dan hman rual loha chakin Lalmuanzova'n a khalh lut a, a cross chu Lalṭha­thanga'n rang tak maiin a thun a, 'classic counter attack' dik tak a ni a, half time-ah 1-0 a ni.

RW lamin second half-ah goal thun ngei an tum a, goal an nawr na hle. Minute 67-na a ni a, khel ṭha tluan chhuak Kitboklang Pale freekick chu mak deuh maiin a tlang phei purh a, Mebanshang Suting chuan goal line bul aṭanga pet lutin 1-1 a ni.

A tawpah RW an ṭha tawlh tawlh a, an Mizo player Lalhruaitluanga'n goal ngei tura rin a hlah a; Aizawl FC-in injury time-ah chance ṭha neiin Vanlalduatsanga'n a thun thei bik lo a, 1-1 in an tawp.

An lungawi ve ve

Aizawl FC coach Nicky Malsawmtluanga chuan, "Chak thei kan ni a, chak lo thei pawh kan ni tel a, kan inbei tawk a, kan result-ah kan lawm thawkhat e. Kan naute zingah tawnhriat la nei miah lote an awm a, kan khingpui an ṭha si a, kan duh angin kan ṭang thei lo a ni," a ti.

An khingpuite chu fakin, "RW hi ka beisei aiin an ṭha. Team ṭha an nih chu ka ring a; nimahsela khatiang taka an khelh theih kha chu ka ring lo a, an system an bel khawp mai," tiin RW khelh dan chu a dahsang hle.

RW head coach Bobby Nongbet chuan, "Ka ui khawp mai. Goal kan chhuah hnu pawh khan kan chak theih ka ring a, kan chak zo ta lo. Kan goal chhuahna anga counter attack chak leh rang kha chu kan hmu zen zen lo a, Aizawl FC kha an fakawm hle mai," a ti.

Bobby chuan Northeast club pali an awm khawm chu, "Group aṭanga pakhat chiah tlang tur a ni hi a pawi. Team ṭha tak vek kan niin ka hria," tiin Mizoram team pahnih pawh a fak hle.