Third round-ah Serena a lut

Western and Southern Open khelh laiah Serena Williams chuan fiahna hautak a paltlang a, a khingpui Arantxa Rus nen set thumna na taka an inchuh hnuah harsa taka hnehna chang hramin third round a inhlangkai.

Nimin zing inkhelah kum 38 mi Serena hian Dutch nula Rus-i hi 7-6 (8-6), 3-6, 7-6 (7-0) in a hneh hram, hnehna chang turin darkar thum deuhthaw a mamawh. American star hian seeded 13-na Maria Sakkari a hmachhawn leh ang.

Grand Slam vawi 23 champion tawh Serena chuan, "Tharum hman a ngai nasa ngei mai, ball ṭha tak leh na takin vaw phei mah ila a rawn vaw let thei zel a, hmachhawn a hautak hle. Inkhel harsa taka hnehna ka chan theih avangin ka lawm," a ti.

Flushing Meadows, New York-a inkhel dangah Naomi Osaka chuan Karolina Muchova 6-7 (5-7), 6-4, 6-2 in a hneh. Japan nula hian inkharkhip hnua a match hmasa ber a khel leh chauh a, duhthusam nghal vek lo mah se bul a ṭan ṭha thawkhat viau.

World number 10 Osaka hian third round-ah chuan seeded 16-na Dayana Yastremska a hmachhawn leh ang. Serena leh Osaka te hian US Open khelh ngei an tum a, hard court inelna lianah hian player en bik leh champion tura rinkai an ni ang.