Guwahati-ah goal ruk a lut

Indian Super League-ah Thawhṭanni zan khan NorthEast United chuan Jamshedpur FC an mikhual a, goal ruk zet luhna inkhelah chak zawk awm loin 3-3 in an ṭin. 

Highlanders tan Federico Gallego chuan minute ngana lekah goal hmahruai a khung a, Jamshedpur lamin David Grande hmangin first half hun pek belhah an chhanglet. 

Goal dang a luh loh reng hnuah Redeem Tlang chuan Guwahati club tan khung lehin 2-1 a ni a, mahse Jamshedpur hian Noe Costa leh Memo hmanga khung ve lehin 3-2 a ni. 

NorthEast-in mahni mualah tlawm an duh lo - hun tawp nan minute hnih chauh a awm tawh tihah Jose Leudo chuan goal a rawn khung ve leh a, 3-3 in inkhel a tawp.

Inkhel boruak 'hot' takah hian JFC forward Farukh Choudhary chu a yellow card pahnihna avangin minute 87-naah hnawhchhuah a ni. 

Hetihlai hian Highlanders-in inkhelh zawhah chanchin thar an nei zui a, coach Robert Jarni chu a hna aṭanga chawlhtir a ni - season khat pawh a enkawl tluan lo. 

Real Madrid leh Juventus defender hlui hian Highlanders tan a match hmasa parukah tlawm a nei lo a, mahse star player Asamoah Gyan a inhliam zui avangin a match hnuhnung pakuaah point thum chiah an hlawh chhuak thung!

Jarni hi Mizo rawlthar Lalengmawia duhsaktu a ni a, JFC lakah pawh bul a ṭantir. Croatian coach hian, "Lalengmawia khelhna anga khel thei player ṭha India hian a nei lo a, he rama midfielder kan neih ṭhat pathum zinga chhiar tel chi a ni," tiin Apuia chungchang a lo sawi tawh. 

Highlanders leh Jarni an inṭhen takah chuan assistant coach Khalid Jamil chuan NorthEast United hi a enkawl lailawk dawn a, Aizawl FC boss hlui tan chona thar a ni.