Gerrard-a'n Wembley kalkawng a zawh zel
League Cup semifinal-a Liverpool-in Chelsea hneh loa an tlak hnuin Nilaini zan khan Bolton Wanderers 2-1 in an hneh a, FA Cup fifth round an lut. Season thara US pan mai tur Steven Gerrard-a'n Wembley kalkawng a zawh zel.
Reebok Stadium-a inkhelah Bolton-in Eidur Gudjohnsen penalty hmangin hma an hruai zet a. Liverpool-in hun tawp dawna Raheem Sterling leh Philippe Coutinho te goal hmangin an lehthal a, 2-1 in an chak.
Gerrard = 700 not out
Anfield-ah Liverpool leh Bolton goal awm loin an inhnehtawk a, replay khelh a ṭul phah. Bolton nena an inhmachhawn ṭum hnihna hi Liverpool captain Gerrard-a tan Liverpool tana a game 700-na a ni.
Liverpool tana Gerrard aia khel tam chu midfielder Ian Callaghan (857) leh Gerrard-a khelhpui ṭhin Jamie Carragher (737) te chiah an awm.
Inkhel chu
Ṭan phat aṭangin Liverpool-in inkhel an thunun nghal a, an ball inpe kual vel a hmuhnawm hle.
English rawlthar duhawm Raheem Sterling leh tunhnaia contract pawt seitu Brazilian midfielder Coutinho te'n Bolton defender-te an chhaihbuai hneh hle.
Liverpool-in inkhel thunun chungin first half-ah goal an khung lo a, mualneitu Bolton-in an khung bik lo.
Second half-ah Liverpool bawkin inkhel an thunun a, goal khung hmasatu erawh Bolton an ni. Liverpool defender Martin Skrtel-a'n Bolton player Zach Clough laka a foul vangin penalty a chawi a, Chelsea leh Barcelona striker hlui Eidur Gudjohnsen-a'n goal-ah chantirin 1-0 a ni.
Liverpool-in an siphurh sut tumin an nawr let a, minute 66-naah Neil Danns-a'n Liverpool midfielder Joe Allen tihtluk avangin yellow card vawi hnihna a chawi a, hnawh chhuah a ni.
Tam zawk nih hnuah Liverpool an hlauhawm sawt a, Emre Can leh Jordan Henderson te'n crossbar an pet per a, Bolton vanneihna a kaltluang zel.
Liverpool manager Brendan Rodgers-a'n minute 70-naah beiseina sang tak nen Daniel Sturridge a luhtir a, English forward hian goal a khung thei bik lo.
Hun tawp hma minute li la awmah Liverpool-in an phu ang ngeiin goal a khung ta a; Emre Can ball pass fing tak chu Sterling-a'n mawi lutukin a volley goal.
Minute 90-naah Coutinho-a'n an contract thar lawm nan chakna goal a khung zui a, Bolton tan sutna hun a awm tawh lo.
Liverpool-in Championship club Bolton lakah goal khung tlai mah se inkhel an thunun avangin 2-1 a chak hi a phu a ni.
Eng nge an sawi?
Liverpool manager Rodgers chuan, "Ka player-te khan an khel ṭha hlein ka hria. An theihna zawng zawngin field chhungah khan an khel a, FA Cup-ah hian kan champion theih kan inbeisei. Neil Lennon khan ṭha takin a player-te a remkhawm a, hna hautak tak min siamsak a ni," tiin an khingpui manager chu a fak.
Bolton manager Neil Lennon chuan, "Thutlukna dik lo khan inkhel a tiho zo vek. Danns-a card hmuh hmasak zawk kha yellow card tur a ni lo. Player 11 ni chunga 1-0 a hma kan hruai lai kha chuan ṭha takin ka player-te'n an khel a. Tlem zawk kan nih chiah khan kan talbuai ta a ni," tiin a sawi.
FA Cup 5th Round Fixtures
SATURDAY FEBRUARY 14
WEST BROM Vs WEST HAM
BLACKBURN Vs STOKE
DERBY Vs READING
CRYSTAL PALACE Vs LIVERPOOL
SUNDAY FEBRUARY 15
ASTON VILLA Vs LEICESTER
BRADFORD Vs SUNDERLAND
ARSENAL Vs MIDDLESBROUGH
MONDAY FEBRUARY 16
PRESTON Vs MAN UTD