Newcastle player thar Jeff Hendrick

Republic of Ireland midfielder Jeff Hendrick chuan Premier League club Burnley aṭangin Newcastle United chu season li chhung atan a zawm, a club khelh mekna in chelh duh mah se chona thar hmachhawn a duh zawk.

Kum 28 mi Hendrick hian 2016 khan Clarets hi pound maktaduai 10.5 in a zawm, a hun lai chuan an club player manto ber a ni. Manager Sean Dyche-a'n chelh a duh a, mahse June thla khan a contract hmang zoin a pawt sei duh lo.

Newcastle United hian neitu thar hnuaiah player ropui tak tak lakluh an tum a, mahse an tum angin neitu thar an nei rih lo. Hetiang karah hian manager Steve Bruce chuan tun nipui bazarah player an lakluh tur thu a lo sawi tawh - Hendrick hi a hmasa ber a ni.

Hendrick chuan, "Newcastle hi club ropui tak an ni, a bik takin an khelmual hi ram chhunga a ṭha berte zinga mi a ni phak. Premier League match 100 chuang ka khel tawh a, boruak hran tem chunga chona thar hmachhawn kha ka duh," a ti.

Newcastle manager Bruce chuan a player thar chungchang sawiin, "Derby tan a khel lai ka hmu tawh, a hnuah Burnley tan a khel leh bawk. Pawisa a lei ngai ni ta se a man a tam khawp ang, club leh ram tana tawnhriat nei ṭha kan senglut thei hi kan vannei hle," tiin a sawi ve bawk.

Season hmasa khan Newcastle United hi Premier League-ah point 44 hmuin 13-na an ni a, season thara an league match hmasa ber atan September 12, Inrinni zanah West Ham United an 

lenchilh ang.