FIFA siamṭhat tumtu Prince Ali

FIFA presidential candidate Prince Ali Bin Al Hussein chuan president-ah thlan tlin a nih chuan FIFA chhunga innghirnghona awm ṭhin tihtawp a tum thu a sawi.

Prince Ali chuan, "Miin huaisen takin an ngaihdan rawn tlangau­pui ṭhin mah se, ngaihsak a hnekin hrem an tawk zawk ṭhin. A nih dan tur ang taka thil hi kalpui a nih thuai ka beisei," a ti.

Prince Ali chuan kum 17 chhung Sepp Blatter-a'n FIFA a kaihhruai chhungin ngaihdan leh duhdan ṭha zawk te'n ngaihsak an hlawh tawk lo ṭhin niin a sawi.

Jordan FA president Prince Ali chuan, "Mi tupawhin FIFA hi siamṭhat a ngai a ni tih hi an hre vek a, a kaw tawp aṭanga theihtawp kan chhuah a ngai. Chumi tur chuan football tana theihtawp chhuah ṭhin mi president atan kan mamawh a ni," a tiin a sawi.

Asian Football Confe­deration vice president ni mek chuan FIFA president chugnchang sawiin, "Sepp Blatter thlan tlin a nih leh chuan FIFA executive committee a member ka nihna aṭangin ka bang ang," a ti bawk.

Sepp Blatter-a president-na hnuaiah FIFA hi eirukna leh hlemhletna thubuai vangin an mualpho hle. FIFA-in thubuai chhui tura an ruat Michael Garcia chuan nikum December thla khan a banna a lo thehlut tawh bawk a ni.