Neymar lakluh dan en liam theih a ni lo: Benedito

Barcelona-in president an thlang dawn hnai a, boruak a lian chho ṭan hle. Barcelona presidential candidate Agusti Benedito chuan Catalan club hruaitute chu na takin a sawisel a, tuna an club dinhmun chhiat chhanah a puh a ni.

Benedito chuan, "Barcelona hruaitute chet dan hi ngaihdam theih a ni lo. Thil inthup tam lutuk hi kan club hian a tuar mek a ni. Thudik engmah hrilh kan ni lo a, thudik chanve min hrilha, thudik tak chu zawi zawiin kan hrechhuak leh tho si a ni," a tiin president bangta Sandro Rosell leh a aiawhtu Josep Maria Bartomeu te chu na takin a sawisel.

Barcelona hian Neymar an lak vangin field chhungah cheṭha mah se field pawnah an buai phah. Barca hian Neymar an lei dawn khan euro maktaduai 57 a khelhna club Santos hnenah an pe niin an sawi a, mahse euro maktaduai 17 chiah an pe tih a hnuah chhuichhuah a ni.

Nikum January thlaa Barcelona president ṭanglai Sandra Rosell a ban hnu phei chuan Ney­mar manah euro mak­taduai 86.2 an seng niin sawi a ni leh a, euro mak­taduai 40 chu Neymar a chhungte hnenah pek a ni.

Chhiah an awl rukte nen chuan Neymar lak nan hian euro maktaduai 100 vel Barca hian an seng thei dawn a ni.

Neymar chungchanga buaina bakah kum 18 aia naupang FIFA dan kalh a an lak avangin kum 2015 chhung chu player thar lalut thei lo tura hrem an ni.