Real an chak mah se...

Nilaini zan La Liga inkhelah Real Madrid-in James Rodriguez leh Jese Rodriguez te goal hmangin Sevilla 2-1 in an hneh a, khelh zat inangah Barcelona aiin point liin an sang.

Real Madrid hian Santiago Bernabeu-ah point thum hlawh chhuak mah se Sergio Ramos leh James te'n inhliam vangin first half-ah field an chhuahsan a; Inrinni zana an hmelma Atletico Madrid an hmachhawn hunah pawh an tel ve thei dawn lo. An star forward Cristiano Ronaldo a rawn khel thei chiah thung ang.

Inkhel chu

Real Madrid-in inkhelh ṭan tirhah goal an chhuah leh teuh viau a, minute hnihna leka hnai tak aṭanga Vitolo pet chu keeper Iker Casillas-a'n a dang ṭha hle.

Minute sarihnaah Ramos chu malpui hliam vangin Nacho-a'n a rawn thlak a, Spanish defender hi kar thum vel chawl tura ngaih a ni.

Real Madrid tlar hnungin fiahna dang an hmachhawn hmain left wing back Marcelo ball pet ṭha tak chu James-a'n thlawk chungin a tauh lut a, goal luh hun hi minute 12-na a ni.

Minute 24-naah Colombian midfielder hi kephah ruh khik vangin thlak a ni a, James hi thla hnih chhung a chawlh rin a ni.

Jese-a'n a khelhna hun neih a hmang ṭangkai a, minute 36-naah Real Madrid goal hnihna a khung.

Real Madrid leh Sevilla goal bawh a na lo ve ve a, hei vang hian Real hian chak turin harsatna an nei dawn lo niin a lang. Amaherawhchu, minute 80-naah substitute Iago Aspas-a'n winger Vitolo thawhrah sengin a pet goal a. Hun tawp lamah Real tlar hnung lamin hna an ngah a, goal erawh an chhuah tawh lo.

Sevilla chungchang

Real Madrid boss Carlo Ancelotti chuan, "Sevilla hi team ṭha tak an ni a, season ṭha tak an hmang a, counter attack-ah an hlauhawm em em bawk. Kan hneh thei hi a lawmawm hle a ni," tiin a sawi.

Bul ṭan danah

Ancelotti chuan, "Inkhel ṭan tirha kan bul ṭan danah hmasawn kan la mamawh zel. Kan match hnuhnung pathum aṭangin inzirna tur ṭha tak kan nei a, concentration ṭha zawk nen bul kan ṭan tur a ni," tiin a sawi.

Elpuite chungchang

Italian boss chuan, "Chhiarkawp ang zawngin ka chhut lo. Season liam ta ang tho kha a ni dawn a, a tawp thlengin theihtawp chhuahin kan bei ang," tiin a sawi.

Derby chungchang

Kartawp inkhel tur sawiin Ancelotti chuan, "Cristiano Ronaldo, Benzema leh Bale te hi an dam ṭha a nih chuan an khel char char ang. Tlar hnungah erawh tawnhriat nei lo zawk Nacho leh Raphael Varane te an inkawp a ṭul dawn, defender pahnih hian tumruhna an nei," tiin a sawi.

Marcelo chu yellow card a hrem vangin derby a khel thei dawn lo. Inhliam vangin Pepe leh Ramos te an khel thei dawn lo bawk.

Chicharito chungchang

Mexican forward Javier Hernandez chunchang sawiin, "Kan ziah luh tawh avang leh kan mamawh avangin kan bulah a awm ang. A khelh zat tur erawh ka sawi thei lo. Kan inhmu tawh a, professional dik tak a ni. Kan bulah a hlim e," tiin a sawi.

Manchester United aṭanga loan hmanga Real Madrid zawmtu Chicharito hian khelhna hmun a chang meuh lo.