Inter petchhuaktu Higuain

Nilaini zan khan Coppa Italia quarterfinal-ah Napoli-in Gonzalo Higuain hmangin Lazio an hneh.

Napoli hian two-legged semifinal-ah Milan hnehtu Lazio an hmachawn ang a; semifinal pakhat zawkah Juventus leh Fiorentina te an khel bawk ang.

Inter Milan-in January transfer-a an lakluh Davide Santon leh Marcelo Brozovic te bakah kum 18-a George Puscas te chu starting eleven-ah dah an ni.

Champion lai Napoli-in bul an ṭan ṭha zawk a, captain Marek Hamsik-a cross chu Higuain-a'n a tauh over a; Inter tan Mauro Icardi-a'n a hlah ve bawk.

Inter midfielder Xherdan Shaqiri ball hlai chu keeper Mariano Andujar tan a a harsa lo a, Swiss midfielder hi Italy-ah beisei angin a la che ṭha lo.

Napoli tan Hamsik leh Higuain te bawk goal-ah an hlauawm a, amaherawhchu minute 90 chhungin goal a lut lo.

Extra time khelh mai tura ngaih a ni hman a, Napoli defender Faouzi Ghoulam-a chuang rang takin throw-in neiin Inter captain Andrea Ranocchia a chesual zui a, Argentine forward Higuain-a'n cool takin chakna goal a khung.

Mancini a thinur

Inter boss Roberto Mancini chuan, "Kha­tiang khan goal kan chhuah tur a ni lo, min barakhaih takzet a ni. Kan khel ṭha a, team angin hma kan sawn tih a hriat a, amaherawhchu tihsual a thiang lo," tiin a lungawi loh thu a sawi.

Goal luh dan sawiin Mancini chuan, "Kan inthlahdul vang a ni. Higuain hi player fing tak a ni a, a goal khung erawh ka player-te dawihzep vang a ni - player pangain forward pakhat an veng hneh lo," tiin a lungawi loh thu a sawi.

Napoli manager Rafa Benitez chuan, "Team ṭha tak lakah chak kan phu zawkin ka hria. Inter hian player ṭha tak tak an nei a, Serie A-ah tuna an awmna aia sang zawka awm an phuin ka hria. An player en hian league-a champion thei tur an ni," tiin a khingpui a fak.

Benitez chuan, "Ghoulam-a'n African Cup a khelh lai khan throw-in chungchang hi telephone-ah kan sawi dun nasa," tiin an goal khung danah a uang zet a, goal khungtu Higuain chu world class striker a nih thu a sawi zui bawk.