Dortmund result a mak tulh tulh

Champion rinkaia bul ṭan Borussia Dortmund-in Nilaini zana FC Augsburg an hneh loh avangin Bundesliga-ah table mawngphahah an awm chhunzawm zel a, tunah chuan tla thei an ni.

Dortmund-in Bayer Leverkusen an draw hnua an game hmasa berah an khelmual Signal Iduna Park-ah player 10-a khel Augsburg 1-0 in an hneh lo a, goal awmchhun hi minute 50-naa Raul Bobadilla thun a ni.

Dortmund boss Jurgen Klopp-a'n starting eleven Pierre-Emerick Aubameyang leh Ilkay Gundogan te a ko kir a; inkhelh ṭan tirh aṭangin Marco Reus leh Kevin Kampl te'n Augsburg tlar hnung an tibuai nghal hle.

Bul ṭan ṭha Dortmund-in goal an khung thei lo a, Augsburg-in first half-ah chance an nei meuh lo.

Second half ṭan aṭanga minute nganaah Dortmund tlar hnung fimkhur tawk loh zarah Bobadilla'n Ausburg tan a khung a, Dortmund ṭantute an hawihai hle.

Minute 64-naah defender Christoph Janker chu Aubameyang tihtluk vangin hnawh chhuah a ni a, Dortmund-in goal khung nan darkar chanve chhung hun an nei.

Point hlawh chhuah ngei tumin Klopp-a'n Henrikh Mkhitaryan leh Shinji Kagawa te luhtir mah se substitute-te hian inkhel an thlak danglam thei lo. Italian forward Ciro Immobile-a'n hun tawp dawnah a chance neih a tauh lut thei lo bawk. Ausburg an ṭang tluan a, 1-0 in inkhel a tawp.

Mipui an thinrim

Dortmund supporter-te'n nkhelh banah an lungawi lo tih an lantir a, captain Mats Hummels leh keeper Roman Weidenfeller te supporter hmaah an insawifiah.

Media kaltlang ni lo, hmai chhana insawifiah hi football-ah thleng khat hle.

Eng nge an sawi?

Dortmund boss Jurgen Klopp chuan, "Engtin pawhin min sawisel se kan pawm thlap. Kan huaisen tawk lo a, kan thiam loh a ni," tiin a sawi.

World Cup champion defender Hummels chuan, "Vawi 19 khelh zawha a tawp bera kan awm a nih chuan fan-te chu an thinrim tur a ni," tiin mipui thinrim chu a hriatthiam thu a sawi.

A mak a ni tawp

Kum 2011 leh 2012 khan Bundesliga-ah Dortmund an champion a, kum 2013 leh 2014-ah pahnihna an ni.

2012-13 season khan league-ah an chet ṭhat bakah Europe-ah an che ṭha tel a, Champions League-ah final an thleng hial. Tun season-ah Champions League-ah beisei an la nei a, round of 16-ah Italian champion Juventus nen an inhmachhawn ang.

Season tirah Jurgen Klopp-a enkawl Dortmund hi Bundesliga-ah Bayern Munich el pha tur bera ngaih ni siin vawi 19 khelhah point 16 chiah an hlawh chhuak a, table-ah 18-na an ni.

Dortmund hi a mawng berah awm mah se tla tur em chuan an dinhmun a chhe bik lo. An chunga awm Freiburg, Suttgart leh Hertha Berlin te'n point 18 vek an hmuh avangin relegation zone chhuahsan hi Dortmund tan harsa tura ngaih a ni lo.

Inkhel Results

Borussia Dortmund 0 - 1 Augsburg

Hoffenheim 1 - 2 Werder Bremen

Hertha BSC 0 - 1 Bayer Leverkusen

FC Cologne 0 - 0 Stuttgart

Paderborn 0 - 3 Hamburger SV